45-гадовага бізнесоўца Аляксандра Троцкага вінавацяць у замаху на забойства супрацоўніка ДАІ. Пракурор Арцём Цюменцаў просіць адзінаццаць гадоў калоніі. Аляксандра ён лічыць вінаватым.
«Я думаю, ён не заслугоўвае такога пакарання. Нават калі ён і… Ну, не. Ніяк не адзінаццаць гадоў. Дакладна не цягне. Гэта праўда», – не стрымлівае эмоцыяў сябар Аляксандра Троцкага Зміцер.
Падчас затрымання Аляксандра моцна збілі сілавікі. Гэтак, пад канвоем і ў кайданках, ён правёў тры тыдні. Але, нягледзячы на гематомы і сляды ад дручкоў, пацярпелы – інспектар ДАІ Уладзімір Юраў. Нібыта 12 жніўня Аляксандр наўмысна правёз яго на капоце машыны. Паводле следства, той атрымаў цялесныя пашкоджанні без кароткачасовага расстройства здароўя. Але ўсе доказы – гэта сведчанні міліцыянтаў. Запісаў з відэарэгістратара няма.
«Няма доказаў факту наезду на супрацоўніка ДАІ, ніякіх. Няма. Яны проста згубіліся недзе, з блізкіх камераў. А недзе здалёк – ёсць. І яны іх як доказы даюць, дзе нябачна літаральна нічога», – кажа сын Аляксандра Данііл.
Паводле Аляксандра, адчыніць дзверы ён пабаяўся, але прапанаваў даць дакументы праз акно. Пасля гэтага Юраў цэліў яму ў галаву пісталетам. Мужчына, баючыся за свае жыццё, выкруціў стырно ўлева і паехаў. Пазней Аляксандра затрымалі. Са словаў адваката, выйсці з аўтамабіля патрабаваў амапавец, які не мае на гэта права. Таму дзеянні падабароннага адпавядаюць закону. Абаронца падкрэслівае, што прычынаю наезду была не спроба забойства, а спроба з’ехаць з месца, дзе яму пагражала небяспека.
«Калі шчыра, я амаль што праплакала. Не ведаю нават, што сказаць», – кажа жонка Аляксандра Ірына.
У апошнім слове Аляксандр папрасіў прабачэння ў сям’і ды блізкіх за тое, што можа пакінуць іх на пэўны час:
«Я заўсёды лічыў, што, калі ты шчыра робіш сваю працу і ў зносінах з людзьмі ты намагаешся прыносіць карысць, гэта і ёсць той самы мінімум, за які ніколі не будзе сорамна».
Суддзя Сяргей Хрыпач абвесціць прысуд 5 сакавіка.
Надзея Бельская, «Белсат»