Малдова асудзіла расейскі ракетны ўдар па Украіне. Афіцыйны Кішынэў падкрэсліў, што выкарыстанне малдаўскай паветранай прасторы для пралёту расейскіх крылатых ракетаў абсалютна непрымальна. Еўрапейскія суседзі Украіны называюць дзеянні Масквы дзяржаўным тэрарызмам і рыхтуюць юрыдычнае афармленне тэрарыстычнага статусу для Расеі.
Глядзіце сюжэт у нашым відэа:
Вось так, пасярод інтэрв’ю аб павелічэнні гуманітарнай і вайсковай дапамогі Украіне, парламенцкі сакратар Міністэрства абароны Латвіі была вымушаная хавацца ад расейскіх ракетаў. Амбасадарка Нямеччыны ў Кіеве Анка Фэльдгузэн падчас абстрэлу таксама хавалася ў адным бамбасховішчы з кіяўлянамі. У сховішчы гатэлю перачэкваў масіраваную атаку еўракамісар юстыцыі Дыд’е Рэндэрс. Пазіцыя Еўразвязу не змянілася: сённяшнія і папярэднія абстрэлы гарадоў – гэта варварскі і баязлівы напад расейскіх войскаў на мірных людзей.
«Гэтыя атакі толькі паказваюць, што Расея выбірае тактыку мэтанакіраваных бамбаванняў мірнага насельніцтва. Гэта якраз тое, што супярэчыць міжнароднаму гуманітарнаму праву, і гэтыя атакі на цывільных асобаў прыраўноўваюцца да ваенных злачынстваў», – заявіў прадстаўнік кіраўніка дыпламатыі Еўразвязу Пэтэр Стана.
Кіраўнік дыпламатыі Еўразвязу Жузэп Бурэль заявіў, што дадатковая вайсковая падтрымка для Украіны – ужо ў дарозе. А старшыня Еўракамісіі, якая сёння наведала Эстонію, заявіла, што шакаваная нападам на ўкраінскія гарады.
«Расея зноўку паказала свету, за што яна выступае: за жорсткасць і тэрарызм. Вінаватыя ў гэтым мусяць панесці адказнасць», – падкрэсліла Урзуля фон дэр Ляен.
Парламент Эстоніі тэрмінова рыхтуе прызнанне Расеі дзяржаваю-тэрарыстам.
«Мы стаім на ўсходняй мяжы Еўразвязу. Далей ужо Расея. І мы звяртаемся да ўкраінцаў: мы будзем падтрымліваць вас усімі сродкамі, якія маем. Што Еўразвяз мусіць зрабіць – гэта як найхутчэй перадаць Украіне сродкі паветранай абароны, якія змаглі б абараніць украінскае мірнае насельніцтва і гарады ад расейскіх атак», – звярнулася да ўкраінцаў прэмʼер-міністарка Эстоніі Кая Калас.
Масіраваны абстрэл украінскіх гарадоў – гэта паказнік адчаю Масквы ад кепскай сітуацыі на фронце, заявіў сёння прэзідэнт Літвы. Гітанас Наўседа наведаў нямецкія падраздзяленні, дыслакаваныя ў Літве, і назіраў за інтэграцыйнымі вучэннямі «Хуткі грыфон».
«Мы мусім быць гатовыя, што крамлёўскі рэжым пабачыць, як вайна ідзе да ганебнай паразы, і паспрабуе максімальна дэстабілізаваць сітуацыю, будзе дзейнічаць у адчаі, а гэта павялічыць агульную пагрозу як ва Украіне, так і навокал», – мяркуе літоўскі прэзідэнт.
Нямеччына бліжэйшымі днямі паставіць ва Украіну першую з чатырох сучасных сістэмаў супрацьракетнай абароны IRIS-T, заявіла сёння міністарка абароны Крыстынэ Лямбрэхт. Таксама Берлін дапаможа ў аднаўленні разбуранай інфраструктуры.
«Заўтра адбудзецца паседжанне “Вялікай сямёркі” праз відэасувязь. Лідар Украіны Уладзімір Зяленскі праз відэасувязь будзе ўдзельнічаць у саміце напачатку», – распавёў у панядзелак прэс-сакратар канцлера Нямеччыны Штэфэн Гэбэштрайт.
Еўразвяз асуджае заявы Аляксандра Лукашэнкі, што Украіна нібыта пагражае нападам на Беларусь, і лічыць іх непрымальнымі.
«Украіна – ахвяра агрэсіі, а не агрэсар. І мы нагадваем рэжыму Лукашэнкі, што Украіна зазнае жорсткі, незаконны нападам, што ёсць парушэннем Статуту ААН і міжнароднага права. І мы заклікаем рэжым у Менску ўстрымлівацца ад любога ўдзелу Беларусі ў гэтым жорсткім, нелегітымным прадпрыемстве», – заявіў прадстаўнік кіраўніка дыпламатыі Еўразвязу Пэтэр Стана.
Таксама Брусель заклікае рэжым у Менску тэрмінова спыніць выкарыстанне беларускай тэрыторыі і беларускай паветранай прасторы для ўдараў расейскіх войскаў па Украіне.
Яраслаў Сцешык, «Белсат»