Нацыянальная футбольная зборная Беларусі не здолела набраць пункты ў чарговым матчы адборачнага турніру да чэмпіянату Еўропы-2024. У гасцявым матчы, які адбыўся ў Тэль-Авіве, нашая дружына нарэшце паказала добры футбол, аднак у выніку саступіла ў дададзены арбітрам час 0:1. Беларусы на чале з Карласам Фэрэрам у двух праведзеных матчах кваліфікацыі засталіся без перамог і маюць прывідныя шанцы на выхад з групы.
Глядзіце сюжэт у нашым відэа:
Тэль-авіўскі стадыён «Блумфілд». На ім футбольная зборная Ізраілю прыняла Нацыянальную каманду Беларусі. Перад пачаткам сустрэчы заўзятары маглі намаляваць на тварах сцяг роднай краіны. Скарысталася спартоваю падзеяй і беларуская дыяспара.
«Мы падрыхтавалі кароткую інфармацыю для ізраільцянаў аб тым, што робіцца ў Беларусі. Колькасць палітвязняў, колькасць арыштаў, пацярпелых. Каб яны зразумелі, супраць якой зборнай яны гулялі, каб даць ім матывацыю выгуляць супраць дыктатуры», – распавёў заўзятар Александр Фруман.
«Раздавалі флаеры, дзе напісана, якія падзеі цяпер адбываюцца ў Беларусі. У Ізраілі некаторыя нават не ведаюць, дзе знаходзіцца Беларусь», – дадала заўзятарка Лілія Паўлава.
Не абмінуў такой падзеі і старшыня Беларускай футбольнай асацыяцыі Мікалай Шарснёў, які прыбыў на матч са сваймі паплечнікамі ды, імаверна, з падарункамі для ізраільскага боку. Яшчэ да стартавага свістка, ужо на арэне, беларускія заўзятары зладзілі акцыю з бела-чырвона-белым сцягам і яскравым пасланнем. У матчы ж упершыню за доўгі час нашая зборная навязвала сваю барацьбу і мела галявыя моманты. Эфект ад гульні пазітыўны, але балаў не набралі, параза – 0:1. Відавочна, вынік не задаволіў і галоўнага трэнера Карласа Фэрэра.
«Нашы намаганні былі накіраваныя на дасягненне іншага выніку. Мы такой паразы не заслугоўвалі. На апошніх хвілінах гульцы крыху стаміліся, аднак зрабілі добрую працу. Я вельмі злы на вынік», – падкрэсліў галоўны трэнер зборнай Беларусі па футболе Карлас Фэрэр.
«Матывацыя трохі ўзнялася, бо прыйшоў новы галоўны трэнер. Па сутнасці, нічога не змянілася, маглі быць безгалявыя нулі, магла быць перамога, аднак яна б нічога не змяніла ў глабальным плане. Ад гэтай зборнай я ўвогуле нічога звышнатуральнага не чакаю», – паведаміў былы футбаліст, трэнер Яўген Вяроўка.
Пасля таго, як саступілі зборнай Ізраілю, шанцаў на выхад з групы ў фінальны раўнд у беларусаў усе менш. Бо да гэтага была нічыя з Андорай ды чатыры паразы. Не верыць у такую магчымасць і майстар спорту Савецкага Саюзу, былы галоўны трэнер нашай моладзеўкі Людас Румбуціс:
«Шанцаў няма. Калі жадаем прэтэндаваць на фінальную стадыю чэмпіянату Еўропы, то мусім перамагаць Андору дзе заўгодна, хоць на Эвэрэсце. Але, з іншага боку, і нашая моладзеўка з Андораю двойчы згуляла ўнічыю. Час мяняецца».
«Пастаянна прыносіць зборную ў ахвяру нейкім будучым цыклам няма ніякага сэнсу. Неабходна рабіць тут і цяпер, а найлепшыя гульцы мусяць выклікацца ў зборную заўсёды, бо іхны век кароткі. Засталіся толькі тэарэтычныя магчымасці праходу на “Еўра”, рэальных шанцаў ужо няма», – распавёў Арцём Сізінцаў журналіст радыё «Свабода».
Ці атрымаецца ў іспанца Фэрэра зрабіць цуд і дасягнуць выніку хаця б у перспектыве?
«Сістэмна ў нас нічога няма ўжо дастаткова даўно. Тыя хлопцы, якія там гуляюць, нават улічваючы палітычную сітуацыю ў нашай краіне, калі яны сябе ніяк не праяўляюць у жыцці, то і на футбольным полі сябе ніяк не праявіш», – падвёў вынікі Яўген Вяроўка.
Пакуль жа ў турнірнай табліцы кваліфікацыі да «Еўра-2024» Беларусь правяла 6 матчаў і размяшчаецца на чацвёртым радку. У лідарах сэкстэту – Швейцарыя і Румынія, з якімі Фэрэру і кампаніі яшчэ гуляць. Найбліжэйшы двубой – 12-га кастрычніка, супраць румынаў.
Павел Алейнікаў, «Белсат»