Новая партыя баевікоў Вагнэра прыбыла ў Беларусь – інфармацыя з’явілася ў тэлеграм-канале «Беларускага Гаюна». Паведамляецца, што цяпер у нашай краіне можа перабываць некалькі сотняў прыгожынскіх наймітаў. Таксама ў Беларусі чарговы раз заўважылі самалёт Прыгожына. Якую небяспеку можа ўяўляць ПВК Вагнэра для краінаў-суседзяў і для саміх беларусаў?
Глядзіце сюжэт у нашым відэа:
У Беларусь прыехала чацвёртая калона вагнэраўцаў – паведамляе маніторынгавая група «Беларускі Гаюн». Паводле яе, на тэрыторыі краіны ўжо не менш за 600–700 баевікоў. Іх размяшчаюць у лагеры каля вёскі Цэль Асіповіцкага раёну. Абстаноўка спакойная – адказваюць раённыя ўлады на пытанні журналістаў аб бяспецы мясцовых жыхароў.
«Лукашэнка нават у вачах свайго электарату наўрад ці выйграе, бо рэпутацыя ў вагнэраўцаў, мякка кажучы, спецыфічная. І насельніцтва ўжо, відавочна, напружылася, чакаючы, што тыя будуць паводзіцца ў адпаведнасці са сваімі норавамі», – кажа палітычны аналітык праекту «Позірк» Аляксандр Класкоўскі.
70 % нашых гледачоў, апытаных праз сацсеткі «Белсату», адназначна лічаць, што вагнэраўцы пагражаюць бяспецы беларусаў. Лукашэнка, падобна, усведамляе настроі ў грамадстве і спрабуе супакойваць народ.
Непакояцца і суседзі. Прэзідэнты Польшчы, Літвы ды Латвіі звярнулі ўвагу партнёраў з NATO на небяспеку, якая сыходзіць з Беларусі пасля размяшчэння вагнэраўцаў.
«Гэта фактар рызыкі. Але ў такім выглядзе, у якім вагнэраўцы цяпер у Беларусі, – з лёгкаю зброяй, без тэхнікі – яны не могуць сурʼёзна паўплываць на нашую архітэктуру бяспекі», – мяркуе Лаўрынас Кашчунас, кіраўнік Камітэту нацыянальнай бяспекі і абароны Сейму Літвы.
Літоўскі бок працягне маніторыць сітуацыю, кажа парламентар. Бо далейшыя планы вагнэраўцаў невядомыя.
«Лукашэнка мае зразумець: калі ПВК Вагнэра пачне дзейнічаць супраць краінаў NATO або Украіны – гэта будзе адказнасць самога Лукашэнкі», – сцвярджае Лаўрынас Кашчунас.
Ці здольная група Вагнэра стварыць рэальную ваенную пагрозу для краінаў NATO і Украіны? Вагнэраўцы больш прыдатныя для гібрыдных аперацыяў, а не для паўнавартаснай вайны, мяркуе вайсковы аглядальнік групы «Інфармацыйны супраціў» Аляксандр Каваленка.
«Як толькі яны бяруць удзел у вайсковым функцыянале, то адбываецца, як у Бахмуце: дзясяткі тысячаў вагнэраўцаў кінулі ў мясарубку, пад нож. І які вынік? Такі, што яны нават горад толкам не маглі захапіць за 10 месяцаў», – тлумачыць Аляксандр Каваленка.
Прапаганда, аднак, імкнецца пашырыць думку, што вагнэраўцы могуць падзяліцца з беларускім войскам нейкім карысным досведам.
«Дыверсійная дзейнасць, тэрарыстычная дзейнасць, дзейнасці ў фармаце дыверсійна-выведвальных групаў – тут сапраўды ёсць чым падзяліцца. Але дзе беларуская армія будзе ўжываць навыкі вядзення гібрыдных баявых дзеянняў?» – разважае Аляксандр Каваленка.
Ці можа Лукашэнка выкарыстаць ПВК Вагнэра дзеля патрэбаў уласнай бяспекі на выпадак новых народных хваляванняў або прыходу ў Беларусь атрадаў узброенай апазіцыі?
«У Лукашэнкі цвіком сядзіць думка, што калі яны здрадзілі Пуціну, то і мне яны ў любы момант могуць здрадзіць. У Пуціна было болей грошай: ён сам прызнаўся, што плаціў мільярды вагнэраўцам. Але яны яму вернымі не засталіся. А ў Лукашэнкі такога “залатога запасу” відавочна няма», – мяркуе Аляксандр Класкоўскі.
Аналітык прагназуе, што вагнэраўцы, імаверна, будуць шукаць сабе працы за межамі Беларусі. Там, дзе яны могуць разлічваць на той заробак, да якога звыклі.
Валянцін Васіленка, «Белсат»