24 лютага, пятая гадзіна раніцы паводле Кіева. Жыхары Украіны прачнуліся ад выбухаў. За некалькі хвілінаў да гэтага Пуцін аб‘явіў пра так званую спецыяльную ваенную аперацыю.
Глядзіце сюжэт у нашым відэа:
Расея атакавала з поўначы, усходу і поўдня. Першыя танкі ўвайшлі з тэрыторыі Беларусі, часова акупаваных Крыму, Луганску і расейскіх гарадоў: Варонежу, Курску і Белгараду. Выбухі раздаваліся паблізу Адэсы, Дняпра, Марыупалю, Краматорску, Івана-Франкоўску і Кіева. Дальнабойнай артылерыяй білі па Харкаве. Ударамі варожыя сілы паспрабавалі вывесці са строю аэрапорты ў Барыспалі, Азёрным, Кульбакіна і Чугуеве, Краматорску і Чарнабаеўцы. Усяго 24 лютага Расея выпусціла па Украіне больш за сто ракетаў, у тым ліку марскога базавання, адзначае Мінабароны ЗША. Уладзімір Зяленскі паведамляе пра 137 загінулых украінскіх вайскоўцаў і 316 параненых. Забітыя больш за 30 мірных жыхароў.
Крывавую вайну ва Украіне Пуцін для ўсяго свету апраўдваў міфічнымі мэтамі: нейкім вызваленнем краіны ад так званых нацыстаў, якія ўсе гэтыя гады нібы не давалі разгарнуцца частцы расейскамоўнага насельніцтва. Маўляў, кіроўныя ўлады зневажалі расейскую культуру і жорстка распраўляліся з тымі, хто ішоў ім наперакор. Зразумела, ключавым складнікам так званай спецаперацыі была ліквідацыя гэтай улады. Расея разлічвала на хуткі захоп украінскай сталіцы. Сустрэла жорсткі адпор і была вымушаная адступіць. Нейкі час у Кіеве было ціха. Але з надыходам зімы атакі на сталіцу ўзмацніліся.
«Кіеў і прэзідэнт Зяленскі – гэта сімвал усяго таго супраціву, які ёсць ва Украіне, і рэжым Пуціна гэтага не чакаў. Гэта, як раз, злуе і раз‘юшвае Пуціна і рэжым. Яны, я думаю, не пакінуць у спакоі Украіну, пакуль Зяленскі будзе галоўнакамандуючым Украіны і яе прэзідэнтам, пакуль Украіна будзе стаяць. А Украіна будзе стаяць, і пераможа», – кажа былы афіцэр спецыяльных сілаў Літвы Аўрымас Навіс.
Акупацыя Украіны пачалася яшчэ ў 2014 годзе. Пасля акупацыі часткі Данбасу і Крымскага паўвострава 8 гадоў Расея нарошчвала сілы для поўнамаштабнага ўварвання. З 24 лютага ўкраінскія ўлады рэгулярна папаўняюць спіс часова акупаваных тэрыторыяў. За 300 дзён вайны ў гэты спіс траплялі населеныя пункты дзевяці вобласцяў: Данецкай, Харкаўскай, Днепрапятроўскай, Луганскай, Запарожскай, Херсонскай, Мікалаеўскай, Сумскай і Чарнігаўскай.
Цяжкай сітуацыя застаецца ў Данецкім рэгіёне. Вядзецца зацяты бой за Бахмут. Калі ў яго ўвойдуць расейскія войскі, гэта адрэжа шлях да забеспячэння ЗСУ і адцягне вызваленне Крэмінной, Лісічанску і Севераданецку.
«Бахмуцкі кірунак – ключавы. Горад трымаем, хоць акупанты робяць усё, каб там не засталося ніводнай цэлай сцяны. Запарожская вобласць, Херсонская, поўдзень у цэлым – паступова памяншаем патэнцыял акупантаў. Мінус склады, мінус лагістыка расейскай арміі», – заявіў прэзідэнт Украіны Уладзімір Зяленскі.
Супрацьпаветраная абарона – адзін з галоўных элементаў абароны Украіны, падкрэслівае Уладзімір Зяленскі. Зенітна-ракетныя комплексы «Patriot» у хуткім часе павінны паступіць ад ЗША. Яны дазволяць збіваць аб’екты, якія ляцяць са звышгукавою хуткасцю. Спіс дзяржаваў, якія перадаюць зброю Украіне, вялікі – больш за 15 краінаў свету. Сярод якіх далёка не блізкія суседзі, такія як Японія, Паўднёвая Карэя ці Аўстралія. Сярод лідараў – краіны Еўразійскага кантыненту: Польшча і Вялікая Брытанія.
«Практычна, усё тое, што мы зараз маем з паступленняў бранятанкавай тэхнікі і сістэм артылерыйскага ўзбраення, тое, што дазволіла нам вызваліць практычна цалкам Харкаўскую вобласць, вызваліць правабярэжную Украіну і паспяхова адлюстроўваць наступ ворага ў тых гарачых кропках, якія зараз ёсць», – кажа вайсковы эксперт Мікола Саламаха.
З пачатку поўнамаштабнага ўварвання Расеі Украіна вызваліла больш за палову захопленых тэрыторыяў – амаль 78 тысяч квадратных кіламетраў. Адною з апошніх такіх перамог быў Херсон. Сляды злачынстваў арміі Крамля ўкраінцы знаходзяць да гэтага часу.
Вайна будзе зацяжной. Спасылаюцца на словы Пуціна аналітыкі амерыканскага Інстытуту вывучэння вайны. Гэта разумеюць і ва Украіне.
«Мы разумеем, што Расея зараз ставіць на кон ужо нават сваё існаванне ў тым выглядзе, у якім яно зараз ёсць, і свае палітычныя амбіцыі, і свае імперскія амбіцыі. Ну а нам дзявацца няма куды. Мы ці пераможам, ці знікнем», – кажа Саламаха.
Вайна забрала жыцці 450 дзяцей, 863 – атрымалі раненні, паведамляюць у Генпракуратуры Украіны. Паводле апошніх звестак ААН, не менш як 6 з паловаю тысяч мірных жыхароў забітыя, больш за 10 тысяч параненыя.
Надзея Бельская, «Белсат»
