Вадзім Мажэйка: «Лукашэнка спрабуе ўсю дзяржаўную службу перавесці пад ружжо»

Ахоўваюць прыроду ад браканьераў і нелегальных дрывасекаў – цяпер будуць таксама ахоўваць дзяржаўную сістэму ўлады ад масавых пратэстаў ці ад партызанаў. Аляксандр Лукашэнка загадаў начальніку Дзяржаўнай інспекцыі аховы жывёльнага і расліннага свету – паставіць усіх «пад ружжо».

Глядзіце сюжэт у нашым відэа:

Інспектары-прыродаахоўнікі і так маюць зброю, але цяпер іх даўзброяць з улікам досведу вайны Расеі супраць Украіны.

У Беларусі стане на яшчэ адну сілавую структуру больш. Інспектары аховы прыроды атрымаюць дадатковую зброю, будуць праводзіць вучэнні і рыхтавацца ваяваць. Такі загад даў Аляксандр Лукашэнка свайму даўняму падначаленаму – начальніку Дзяржаўнай інспекцыі аховы жывёльнага і расліннага свету Юрыю Церцелю.

«Інспекцыя адносна ваенізаванае фармаванне… У цябе ўся інспекцыя павінна стаць пад ружжо, не дай бог… Гэта не таму што надзвычайная сітуацыя нейкая, але ўсе мы мужыкі, мы павінны быць да гэтага гатовы. Ну, а табе трэба навучыцца кіраваць гэтым войскам. Калі, я гавару, раптам, не дай бог. Але вучэнні праводзіць трэба», – казаў Церцелю Лукашэнка.

У Інспекцыі служаць паўтысячы чалавек, у тым ліку былыя вайскоўцы і міліцыянты. Структура падначаленая непасрэдна Лукашэнку, і афіцыйна кантралюе пытанні палявання, рыбалоўства, высякання лесу і гэтак далей. Але цяпер службоўцы будуць вучыцца лавіць не толькі браканьераў, але і партызанаў – незаконныя ўзброеныя фармаванні – і разганяць пратэсты. Лукашэнка загадаў Юрыю Церцелю арыентавацца на новыя задачы Міністэрства надзвычайных сітуацыяў, якое ўзначальвае Вадзім Сіняўскі, генерал-маёр міліцыі, былы начальнік аддзелу ў Службе бяспекі Лукашэнкі.

«Першае – гэта ўнутраныя праблемы, звязаныя з масавымі беспарадкамі. Таму ў інтарэсах органаў унутраных справаў мы гэтую задачу будзем вырашаць. У выпадку ўзброенага канфлікту і агрэсіі адносна нашай краіны – у інтарэсах Мінабароны», – тлумачыў міністр надзвычайных сітуацыяў Вадзім Сіняўскі ў эфіры дзяржаўнага тэлебачання.

Пры гэтым ратаўнікам выдадуць і зброю, і баявую тэхніку.

«Пісталеты, аўтаматы, кулямёты, гранатамёты, ці мы іх яшчэ будзем узбройваць яшчэ і тэхнікай нейкай? Думаю, так…» – загадваў сілавікам Лукашэнка яшчэ да пачатку адкрытай фазы вайны Расеі супраць Украіны.

Юрый Церцель – родны брат Івана Церцеля, старшыні КДБ. Раней ён камандаваў самым засакрэчаным спецназам пры Памежным камітэце. АСАМ – Асобная служба актыўных мерапрыемстваў з неабмежаванымі паўнамоцтвамі, якое дзейнічае на ўсёй тэрыторыі Беларусі і падпарадкоўваецца непасрэдна Аляксандру Лукашэнку.

«Ён таксама быў распрацоўнікам разам з Іванам Церцелем аперацыі “Шлюз” па нелегальнай перапраўцы мігрантаў у Еўразвяз», – распавёў «Белсату» былы начальнік аддзелу ГУБАЗіК Аляксандр Азараў, які цяпер прадстаўляе ініцыятыву BYPOL.

У праграме «Глабальнае пытанне» на «Белсаце» мы распавядалі, як афіцэры АСАМу ўдзельнічалі ў спецаперацыі «Шлюз» – арганізаваным атачэннем Лукашэнкі трафікам нелегальных мігрантаў. Групоўка чыноўнікаў і вайскоўцаў атрымлівала немалыя грошы з кожнага мігранта.

У 2021-м годзе сілавікі перасталі хавацца, і арганізавалі нелегальны трафік тысячаў мігрантаў ад Менскага аэрапорту да межаў Літвы, Латвіі і Польшчы, каб прымусіць Еўразвяз зняць санкцыі супраць Лукашэнкі.

«Мы таксама ведаем, што АСАМ прымаў удзел у разгонах пратэстаў у 2020-м годзе. Было шмат фота і відэа, калі АСАМ кідаў гранаты ў пратэстоўцаў», – кажа Аляксандр Азараў.

У ручным спецназе Лукашэнкі служылі ягоныя сыны Віктар і Дзмітрый. Віктар Лукашэнка ўваходзіў у Савет Бяспекі, цяпер ён генерал-маёр запасу і прэзідэнт Нацыянальнага Алімпійскага камітэту.

А Юрый Церцель цяпер будзе ствараць яшчэ адну сілавую структуру. І ў гэтым ёсць не толькі практычны, але і сімвалічны складнік, тлумачыць палітычны аналітык Вадзім Мажэйка:

«Лукашэнка спрабуе ўсю дзяржаўную службу перавесці пад ружжо. Кагосьці ў сімвалічным сэнсе, калі ўводзіць кодэксы паводзінаў чыноўнікаў, каб усе былі, як у войску, у плане падпарадкавання».

Агульная задача – стварыць войска чыноўнікаў, адданых Лукашэнку.

«Гэта такая рэакцыя ўладаў на грамадскі выбух, які адбыўся ў 2020-м, калі ўлада зразумела, што нават тыя, хто працуе ў дзяржорганах, хто працуе ў сістэме, нават яны далёка не ва ўсім Лукашэнку падтрымліваюць», – мяркуе Вадзім Мажэйка.

Таму нават у Інспекцыі аховы прыроды Церцель правёў паказальныя чысткі нелаяльных.

«Вамі абсалютна правільна было заўважана, што быў беспарадак, стаўленне да працы абыякавае, нават злачынна абыякавае», – так Юрый Церцель даваў Лукашэнку справаздачу аб масавых звальненнях.

А самога Юрыя Церцеля, калі што, можа замяніць Юрый Коўшык. Намеснік начальніка Дзяржінспекцыі сам быў начальнікам упраўлення ў спецназе АСАМ ды мае медалі ад Аляксандра Лукашэнкі, у тым ліку «За баявыя заслугі» і «За бездакорную службу».

Яраслаў Сцешык, «Белсат»