Тым часам гарады краіны захапіла галалёдзіца. Людзі скардзяцца на слізкія ходнікі і дарогі. Ажно дзве тысячы чалавек за апошнія два дні звярнуліся да траўматолагаў. Камунальнікі ж тым часам занятыя іншай «важнай» на іх думку справай – пасыпаюць пяском сцягі на заледзянелых азёрах. Анастасія Русецкая працягне.
На каньках – па асфальце! Такую карціну напярэдадні можна было назіраць у розных гарадах Беларусі. Прычынай анамальнай галалёдзіцы стаўся паўднёвы цыклон. У нашую краіну, дзе трымалася мінусавая тэмпература, ён прынёс мокры снег з дажджом.
Жыхары Магілёва распавядаюць:
«Раніцай учора, як першы дзень гэта было, давялося спазніцца на працу. У мяне маленькае дзіця вельмі цяжка ішло па дарозе, падаў, не пасыпана. Раніцай а сёмай гадзіне мы выехалі з дому, ехаць немагчыма было».
«Учора мой унук ішоў у першы клас і некалькі разоў упаў. Гэта добра, што без наступстваў. Раніцай было ўвогуле немагчыма».
«Я выйшла з пад’езду, надзела дуцікі, яны ж слізкія, не разлічыла. Побач гэтая скрыня з пяском стаіць, але ніхто не пасыпае. Я толькі думала, хоць бы ў гэтую скрыню галавой не ўрэзацца».
Мянчанцы Святлане пашанцавала меней. Яна паслізнулася і ўпала каля свайго дому. У траўмапункце дыягнаставалі чэрапна-мазгавую траўму.
Як паведамляе Міністэрства аховы здароўя, да медыкаў з траўмамі за два дні звярнуліся больш за дзве тысячы беларусаў. Больш за ўсё пацярпелых ад галалёду ў Гомельскай вобласці – амаль 900 чалавек.
Змагацца з абледзянелымі ходнікамі, каб уратаваць сябе ад падзення, беларусам даводзіцца самастойна. Гэтак, гамяльчанка, каб бяспечна прайсці па коўзкай вуліцы, дастала пачак солі ды пасыпала перад сабой дарогу. Незадаволеныя працай камунальнікаў і жыхары іншых гарадоў.
Магілёўцы абураюцца:
«Падаткі з нас яны патрабуюць, мы плацім і за дарогі, і за розную лухту, а пяском нідзе нічога не пасыпана. Людзі ломяць рукі, ногі».
«Упала літаральна секунду таму. Да гэтага часу баліць».
«Дзе пасыпана, там нармальна. А дзе не пасыпана, там не вельмі зручна».
Рабіць у час сваю працу камунальнікам, відаць, замінае занятасць. Яны засыпаюць пяском… сцягі на лёдзе. Змагацца з бел-чырвона-белымі сімваламі дапамагаюць ім і іншыя службы. На сцягі ў сажалках палюе «Зялёнбуд».
Жыхары Віцебску кажуць:
«Мне здаецца, ёсць іншыя справы, чым па сажалках лазіць».
«Я б на месцы дзяржавы прасцей да гэтага ставіўся. Трэба даваць людзям голас».
«Па-мойму, можна паглядзець навокал і пабачыць, што ёсць больш важныя справы».
«Непрыгожа гэта рабіць. У кожнага сваё меркаванне. Я, напрыклад, да бел-чырвона-белага сцяга стаўлюся вельмі добра».
Галалёдзіца захаваецца і заўтра. На нядзелю сіноптыкі абвесцілі жоўты ўзровень небяспекі.
Анастасія Русецкая Белсат