Сёння ва ўсёй Беларусі адзначаецца Дзень настаўніка. Пра прэстыж прафесіі і выклікі для настаўнікаў розных пакаленняў – у нашым рэпартажы.
У першую нядзелю кастрычніка больш за сто тысяч беларускіх настаўнікаў адзначаюць сваё прафесійнае свята. Але гэты дзень – нагода не толькі для віншаванняў.
Настасся Чыргун працуе ў менскай школе настаўніцай ангельскай мовы ўжо другі год. Кажа, што збольшага праца ёй падабаецца, але ёсць нюансы.
«Я прыходжу дадому і мне не хочацца анічога. Пакуль у школе, я ў тэмпе, усё вельмі дынамічна. Падрыхтоўка да заняткаў забірае вельмі шмат часу», – распавядае дзяўчына.
Пяць, а часам і сем заняткаў штодня, плюс класнае кіраўніцтва. Настаўніца вядзе класныя гадзіны, пазашкольныя імпрэзы, сочыць за наведвальнасцю і харчаваннем класу, а таксама ходзіць да сваіх вучняў дадому. Яна кажа, што дзеці забіраюць шмат энергіі, але таксама яе і даюць:
«Калі перад урокам дзеці размалёўваюць усю дошку і пішуць, як яны любяць сваю настаўніцу, якая я прыгожая, добрая, супер-зорка, ты прыходзіш, цябе абдымаюць – гэта варта таго».
Але падобным стаўленнем да сябе цешацца не ўсе настаўнікі.
«У прынцыпе настаўнік цяпер проста безабаронны перад бацькамі», – мяркуе намеснік старшыні Таварыства беларускай школы, настаўнік фізікі Алесь Сядзяка.
Падчас падрыхтоўкі сюжэту мы папрасілі менчукоў распавесці, што яны думаюць аб прэстыжы настаўніцкай прафесіі. І вось што пачулі:
«Ад настаўніка залежыць усё. Дзеці прыходзяць, яны маленькія, фармуюць грамадства, ад грамадства залежыць асоба».
«Што будзе ў свеце без настаўнікаў? Інтэрнэт і ўсе навуковыя тэхналогіі не здолеюць гэтага зрабіць. Вельмі важны чалавечы фактар, я лічу».
«Прэстыжнай – не, але вельмі важнай. Ад гэтай прафесіі залежаць нашае будучае пакаленне. Трэба ім неяк заробкі павысіць».
У справаздачы да Лукашэнкі міністр адукацыі Ігар Карпенка заявіў, што за першыя сем месяцаў 2019 года ў сярэднім настаўнікі атрымлівалі 900 рублёў на месяц, і паабяцаў зрабіць заробкі, як у сярэднім па краіне, – да 2025 года. Да такіх ініцыятываў эксперт Алесь Сядзяка ставіцца скептычна:
«Некалькі год таму гучна прагучала, што стаўкі настаўнікам будуць павышацца з 18 гадзін да 20. Але колькі настаўнікі атрымлівалі за 18 гадзін, столькі ж яны атрымліваюць за 20. Атрымліваецца, што заробкі былі зніжаныя на 10 %».
Настаўніца Ганна Севярынец мяркуе, што галоўная праблема сучаснай беларускай школы – не грошы, і нават не бюракратыя, а няведанне ўласных жаданняў і патрабаванняў. І нават пасля трагедыі ў Стоўбцах, калі вучань забіў настаўніцу ды іншага вучня, ці пасля скандалу ў Гомлі – пазітыўных зрухаў не назіраецца
«Пасля стаўпецкай трагедыі ў нас паставілі металашукальнікі, якія пішчаць бясконца на ўсіх і нічога не вырашаюць. А пасля гомельскага здарэння ва ўсіх дзяцей адабралі тэлефоны», – кажа яна.
Нягледзячы на высокую адказнасць і нагрузку, ды не настолькі высокія, як бы хацелася, заробкі, паводле падлікаў Белстату, прадстаўнікоў гэтай прафесіі ў нашай краіне каля 116 тысяч чалавек. На кожнага з іх у сярэднім прыпадае больш за восем вучняў, а гарадскія настаўнікі даюць рады нават з дзесяццю вучнямі кожны.
Ксенія Тарасевіч belsat.eu
