У Грэцыі адбылося лабавое сутыкненне пасажырскага і грузавога цягнікоў. Загінулі 32 асобы, 85 атрымалі раненні. «Reuters» піша, што гэтая чыгуначная аварыя стала ў краіне самай буйной за апошнія дзесяцігоддзі.
Цягнікі сутыкнуліся на вялікай хуткасці. Першыя чатыры вагоны пасажырскага цягніка сышлі з рэек, два загарэліся. Яны былі амаль цалкам знішчаныя агнём.
У цягніку, што ехаў з Афінаў у Тэсалёнікі, былі каля 350 пасажыраў.
«Мы пачулі моцны выбух. Гэта было падобна да землятрусу. У вагоне была паніка, людзі крычалі», – распавялі пасажыры.
Выратавальная аперацыя на месцы здарэння працягваецца.
Чаму два сустрэчныя цягнікі апынуліся на адной каляіне, пакуль не высветлена.
A head-on collision between two trains in #Greece has left more than 30 people dead. Dozens of others have been injured in the incident. pic.twitter.com/LYmRmB74Qd
— Iran Daily (@IranDailyWeb) March 1, 2023
Папярэдняя буйная чыгуначная аварыя здарылася ў Грэцыі ў 1972 годзе, калі ў выніку сутыкнення двух цягнікоў загінулі 19 асобаў.
Агенцтва «Reuters» адзначае, што чыгуначная сістэма ў краіне састарэла і вымагае мадэрнізацыі. Шмат якія цягнікі едуць па аднакалейках, а сістэмаў сігналізацыі і аўтаматычнага кіравання наогул шмат дзе няма.
Сяргей Крот belsat.eu