Прэзідэнт ЗША Джой Байдэн презентаваў мірны план, які дазволіць спыніць вайну ў сектары Газа і вызваліць ізраільскіх закладнікаў.
Прэзідэнт ЗША Джой Байдэн у сваёй прамове падкрэсліў, што план быў распрацаваны «пасля інтэнсіўнай дыпламатыі»: шматлікіх перамоваў з лідарамі Ізраілю, Катару, Егіпту і іншых краінаў Блізкага Усходу.
План, які агучыў амерыканскі лідар, складаецца з трох этапаў.
Першы этап прадугледжвае спыненне агню на шэсць тыдняў і вывад ізраільскіх войскаў з усіх паселішчаў сектару Газа. Гэты этап будзе суправаджацца абменам часткі закладнікаў (у першую чаргу жанчын, дзяцей, старых) на сотні палестынскіх вязняў. Таксама будуць рэзка павялічаны аб’емы гуманітарнай дапамогі ў пацярпелыя раёны.
Другі этап прадугледжвае поўнае спыненне ваенных дзеянняў у сектары Газа і вызваленне ўсіх ізральскіх закладнікаў, уключаючы вайскоўцаў. Пасля гэтага павінны распачацца мірныя перамовы.
Трэці этап прадугледжвае маштабнае аднаўленне сектару Газа пры ўдзеле ЗША і міжнароднай супольнасці.
Паводле прэзідэнта ЗША, народ Ізраілю можа не турбавацца наконт сваёй далейшай бяспекі, бо «Хамас» панёс вялізарныя страты і цяпер не здольны паўтарыць тэрарыстычны напад, які быў учынены 7 кастрычніка 2023 году. Менавіта ў гэтым і заключалася мэта ваеннай аперацыі Ізраілю ў Газе, нагадаў Байдэн. На думку прэзідэнта, працяг вайны ў пагоні за незразумелай ідэяй «поўнай перамогі» прывядзе толькі да таго, што Ізраіль загразне ў Газе і трапіць у міжнародную ізаляцыю.
Байдэн таксама выказаў спадзеў, што на гэтыя ўмовы пагадзіцца «Хамас».
«Цяпер сапраўды вырашальны момант… «Хамас» кажа, што хоча спынення агню. Гэтая здзелка з’яўляецца магчымасцю даказаць свае словы справай», – падкрэсліў палітык.
Прычым ён зазначыў, што калі палестынская групоўка не выканае свае абавязкаў, то Ізраіль будзе мець права аднавіць ваенную аперацыю.
Глеб Нержын belsat.eu
