Падчас суда Рыгор Кастусёў заявіў, што з боку следства на яго аказваўся ціск

У судзе Менскага раёну 1 жніўня працягваецца пасяджэнне па справе «аб змове з мэтай захопу ўлады» у дачыненні да пяці чалавек: Рыгора Кастусёва, Аляксандра Фядуты, Юрыя Зянковіча, Вольгі Галубовіч і Дзяніса Краўчука.

Пасля абвяшчэння абвінавачанняў першым дапыталі лідара партыі БНФ Рыгора Кастусёва. Ён заявіў, што на этапе следства на яго аказваўся ціск, паведамляе «Sputnik».

Падчас суда пракурор зачытаў паказанні Кастусёва следчаму КДБ. Па словах пракурора, 15 красавіка 2021 года Кастусёў адмовіўся даваць паказанні, а потым напісаў чыстасардэчнае прызнанне аб тым, што Зянковіч прапаноўваў яму прыняць удзел у онлайн-канферэнцыях. Калі на судзе пракурор спытаўся ў яго, ці не абгаварыў Кастусёў кагосьці з абвінавачаных, той адказаў: «Імкнуўся не агаворваць, цяжка ўспомніць».

Таксама Кастусёў заявіў, што, калі ён ужо быў у СІЗА, сілавікі часова затрымлівалі яго дачку і зяця.

«Калі тваю сям’ю рэпрэсуюць, напішаш што заўгодна», – сказаў палітык.

Кастусёў дадаў, што ведаў, што яго могуць затрымаць, але не ўцёк з Беларусі, хаця мае жыллё за мяжой. Ён таксама заявіў, што зяць адной з дачок зʼехаў у Польшчу, яшчэ адна дачка з чатырма дзецьмі таксама зʼехала з Беларусі пасля яго затрымання.

Суд у так званай «справе змоўнікаў» пачаўся 29 ліпеня. На лаве падсудных – палітзняволеныя палітолаг і літаратуразнаўца Аляксандр Фядута, кіраўнік Партыі БНФ Рыгор Кастусёў, сябра БНФ Вольга Галубовіч, актывіст і дальнабойнік Дзяніс Краўчук, а таксама юрыст Юрый Зянковіч. Справу разглядае суддзя Уладзімір Арэшка. Паводле БелТА, Аляксандр Фядута прызнаў віну часткова.

• Юрый Зянковіч абвінавачваецца паводле ч. 1 арт. 357 КК («Змова з мэтай захопу дзяржаўнай улады неканстытуцыйным шляхам»), ч. 1 арт. 361-1 КК («Стварэнне экстрэмісцкага фармавання і кіраўніцтва ім»), ч. 3 арт. 361 КК («Публічныя заклікі да захопу дзяржаўнай улады»), ч. 3 арт. 130 КК («Распальванне сацыяльнай варожасці»).
• Аляксандр Фядута і Рыгор Кастусёў – паводле ч. 1 арт. 357 КК («Змова з мэтай захопу дзяржаўнай улады неканстытуцыйным шляхам»).
• Вольга Галубовіч і Дзяніс Краўчук – паводле ч. 1 арт. 342 КК («Актыўны ўдзел у групавых дзеяннях, якія груба парушаюць грамадскі парадак»).
• Справу расследаваў Камітэт дзяржаўнай бяспекі Беларусі. Фігурантамі справы застаюцца таксама псіхіятр Дзмітрый Шчыгельскі, экс-супрацоўнік спецпадраздзялення МУС «Алмаз» Ігар Макар, а таксама Аляксандр Перапечка, Павел Кулажанка і Віталь Макаранка, якія цяпер за мяжамі Беларусі.

Пяцярых абвінавачаных затрымалі ў сярэдзіне красавіка 2021 года. Праваабаронцы прызналі палітвязнямі ўсіх, акрамя Юрыя Зянковіча. Фігурантаў справы трымаюць за кратамі больш за 15 месяцаў. «Белсат» працягвае сачыць за працэсам.

Алена Рувіна belsat.eu