Польскі Сейм прагаласаваў за працяг надзвычайнага становішча на беларуска-польскай мяжы. Адмысловы рэжым падоўжылі на два месяцы.
30 верасня прэзідэнт Польшчы Анджэй Дуда падпісаў запыт аб працягненні надзвычайнага становішча на мяжы з Беларуссю і накіраваў яго ў Сейм. Дэпутаты прынялі запыт і працягнулі надзвычайнае становішча на 60 дзён.
«Сейм прагаласаваў за падаўжэнне надзвычайнага становішча на мяжы Польшчы і Беларусі на фоне ціску беларускага рэжыму, які спрабуе дэстабілізаваць сітуацыю ў Беларусі, а таксама на фоне росту нелегальнай міграцыі, арганізаванай беларускім рэжымам у спробе дэстабілізаваць Еўразвяз», – піша ў сваім Twitter Сейм Польшчы.
Надзвычайнае становішча Польшча ўвяла 3 верасня ў прымежнай зоне шырынёю 3 км, што закранула 115 паселішчаў у Падляскім ваяводстве і 68 – у Люблінскім. Сярод іншага, яно азначае забарону на правядзенне масавых і забаўляльных імпрэзаў, дзяжурства паліцыі ва ўзмоцненым рэжыме, правяранне дакументаў. На названай тэрыторыі не могуць быць асобы, якія там не жывуць, не працуюць ці не вучацца.
СК belsat.eu
