Партал TUT.by замовіў экспертызу запісу, на якім мужчына голасам, падобным да голасу Мікалая Карпянкова, кажа пра неабходнасць стварэння лагеру для пратэстоўцаў і абражае загінулага падчас пратэстаў Аляксандра Тарайкоўскага. Выявілася, што прамоўца – сапраўды кіраўнік унутраных войскаў.
Фанаскапічнае даследаванне на замову TUT.by ладзіла расейскае бюро «ГлавЭксперт», што займаецца незалежнымі экспертызамі. Супастаўлялі два запісы. Першы – інтэрв’ю Мікалая Карпянкова, апублікаванае тэлеканалам «Беларусь 1» 18 кастрычніка 2020 года.
Другі – запіс «ByPol».
Эксперты прыйшлі да высновы, што галасы ў абодвух выпадках належаць аднаму чалавеку. У запісы «ByPol» прыкметаў мантажу не выявілі.
15 студзеня «ByPol» апублікаваў запіс, на якім чалавек з голасам, падобным да голасу Карпянкова, заявіў пра неабходнасць стварэння лагеру для пратэстоўцаў і заклікаў ужываць зброю, нават калі гэта можа прывесці да смерці.
«Кіраўніком дзяржавы мы прыкрытыя з усіх бакоў у плане ўжывання зброі. Па-варʼяцку, кажа, адразу, вядома, са зброі лупіць не трэба. Трэба, кажа, даць чалавеку шанец у гэтай сітуацыі, каб ён усвядоміў. Але, а калі няма, тады, атрымліваецца, ужо секануць дык секануць! Бо час такі, не каляровая рэвалюцыя – гібрыдная вайна», – сказаў голас.
Хутчэй за ўсё, запіс зроблены ў канцы кастрычніка. Тады новым міністрам унутраных справаў прызначылі Івана Кубракова, а Карпянкоў, які кіраваў ГУБАЗіКам, узначаліў унутраныя войскі.
«Фэйкаў мы не каментуем», – ацаніла запіс прэс-сакратар МУС Вольга Чамаданава.
ЯП, belsat.eu
