У Беларусі 2 траўня пачынаецца рэгістрацыя абітурыентаў на цэнтралізаванае тэставанне (ЦТ). Зарэгістравацца можна да 1 чэрвеня. Кожны абітурыент мае права асабіста падаць заяву для ўдзелу ў ЦТ не больш як па чатырох прадметах. Як гэта зрабіць, тлумачыць Рэспубліканскі інстытут кантролю ведаў.
Пункты рэгістрацыі на ЦТ будуць працаваць і 2 траўня, нягледзячы на тое, што ў Беларусі гэта выходны дзень.
Рэгістрацыя абітурыентаў пройдзе з 2 траўня да 1 чэрвеня. Абітурыенты могуць падаць заяву для ўдзелу і на беларускай мове. Зрабіць гэта можна онлайн, запоўніўшы электронную форму на сайце РІКВ, або асабіста, або праз законнага прадстаўніка. Для гэтага трэба наведаць адзін з пунктаў рэгістрацыі.
Для таго, каб не было масавага збору людзей у пунктах рэгістрацыі, арганізаваны папярэдні запіс. Абітурыентам раяць перад наведваннем азнаёміцца з інфармацыяй на сайце выбранага пункту рэгістрацыі.
Усе пункты рэгістрацыі будуць працаваць з 9:00 да 19:00. У суботы 14 і 28 траўня – да 18:00. Сёлета абітурыент мае права зарэгістравацца для ўдзелу ў ЦТ не больш як па чатырох вучэбных прадметах.
Падаўшы заяву і аплаціўшы ЦТ (адзін навучальны прадмет каштуе 0,1 базавай велічыні, а гэта 3 руб. 20 кап.), абітурыент мусіць забраць свой пропуск для ўдзелу ў ЦТ – да 1 чэрвеня.
У 2022 годзе ЦТ стартуе 14 чэрвеня і працягнецца да 6 ліпеня.
Рэзервовыя дні правядзення ЦТ – 12 і 14 ліпеня (па беларускай і расейскай мовах), 12 і 16 ліпеня – па астатніх прадметах.
Адрасы пунктаў рэгістрацыі і тэставання падаюцца на сайце Рэспубліканскага інстытуту кантролю ведаў.
ЗК belsat.eu
