Уладзімір Пуцін 2 кастрычніка ўнёс у Дзяржаўную Думу Расейскай Федэрацыі законапраекты аб уваходзе ў склад Расеі чатырох вобласцяў Украіны. Дзве з іх расейскія войскі кантралююць хіба на палову – вайна ва Украіне трывае. Законапраект плануюць пачаць разглядаць 3 кастрычніка.
Паводле праекту, які ўнёс Уладзімір Пуцін, у склад Расеі прапануюць прыняць тэрыторыі самаабвешчаных «Данецкай народнай рэспублікі» і «Луганскай народнай рэспублікі», Запарожскай і Херсонскай вобласцяў Украіны ў межах вобласцяў і «рэспублік» (якія Пуцін прызнаў у межах адпаведных вобласцяў). На момант унясення праекту расейскія войскі кантралююць палову Запарожскай вобласці (без Запарожжа) і палову Данецкай (днём раней адступілі з Ліману), большую частку Луганскай і Херсонскай вобласцяў (але не цэлыя вобласці, трываюць баі).
Людзям на анексаваных тэрыторыях і ўцекача адтуль законапраект абяцае аўтаматычнае наданне расейскага грамадзянства – трэба толькі падаць заяву і прысягнуць Расейскай Федэрацыі. Грашовай адзінкай у анексаваных тэрыторыях абвяшчаецца расейскі рубель, але да канца 2022 года прапануецца дапускаць абарот грыўні. Усім народам «гарантуецца» права на вывучэнне роднай мовы, але расейская прапануецца як адзіная дзяржаўная.
A map of the approximate situation on the ground in Ukraine as of 00:00 UTC 02/10/22. pic.twitter.com/yE3J1ashfL
— War Mapper (@War_Mapper) October 2, 2022
Хто стане кіраўнікамі анексаваных тэрыторыяў, Пуцін мае вырашыць цягам 10 дзён, «выбары» ў «парламенты» плануюць правесці ў верасні 2023 года. Вайсковыя фармаванні з анексаваных тэрыторыяў прапануецца ўключыць ва Узброеныя сілы расейскай федэрацыі і іншыя расейскія фармаванні. Асобна ў законе прапісаныя пункты пра атамную энергетыку: у Запарожскай вобласці Расея захапіла атамную электрастанцыю.
Законапраект плануюць разглядзець у Дзяржаўнай Думе 3 кастрычніка, у Савеце Федэрацыі – 4 кастрычніка. Калі яны ўхваляць праекты, Пуцін яшчэ мусіць падпісаць прапанаваны ім закон.
Анексію не прызналі Украіна, Еўразвяз, Вялікая Брытанія, Злучаныя Штаты і нават краіны, якія лічылі некалі «сябрамі» Пуціна, як то Казахстан, Сербія і Турэччына.
Алесь Наваборскі belsat.eu