Кіраўнік Народнага антыкрызіснага ўпраўлення і прадстаўнік Пераходнага кабінету ў справе транзіту ўлады Павел Латушка заклікаў Захад яшчэ больш узмацніць санкцыі супраць беларускага рэжыму, якія будуць здольныя паралізаваць сістэму.
Павел Латушка падкрэсліў, што санкцыі павінны ўводзіцца па прынцыпе прыналежнасці да дзяржапарату і дзяржструктур. Таксама важна, каб былі заведзены публічныя адкрытыя крымінальныя справы на Лукашэнку і ягоных памагатых, сказаў Латушка.
«Вы ніколі не зможаце быць дастаткова заклапочанымі, каб спыніць вайну ва Украіне і масавыя рэпрэсіі ў Беларусі. Глыбокая заклапочанасць нічога не мяняе і ніколі не мяняла. У Беларусі ёсць такі выраз: «Дна няма». Мы выкарыстоўваем яго, калі ў краіне адбываецца штосьці, што яшчэ ўчора было неймаверна, калі чарговыя дзеянні Лукашэнкі даказваюць, што жорсткасці, вар’яцтву, цынізму рэжыму Лукашэнкі проста няма мяжы. Пачуйце мяне: сёння ў Беларусі дна няма», – заявіў Латушка.
На яго думку, няздольнасць вырашыць праблему з Лукашэнкам у 2020 годзе прывяла да таго, што ў 2022 Уладзімір Пуцін змог выкарыстаць яго для акупацыі Беларусі і ўварвання ва Украіну. «Без Лукашэнкі ніякай вайны магло б і не быць».
Таксама Латушка адзначыў, што Лукашэнка з’яўляецца часткай глабальнай праблемы, якая ўзнікла менавіта таму, што гэтая частка выклікала больш выразаў заклапочанасці, чым рэальных дзеянняў. «Санкцыі прымаліся марудна, з затрымкамі, з выключэннямі. Дыпламатычныя адносіны не былі цалкам разарваныя. Супраць рэжыму не ўзбуджаліся крымінальныя справы, хаця механізм універсальнай юрысдыкцыі гэта дазваляў», – дадаў ён.
«Мы зноў рызыкуем паўтарыць сітуацыю 2020 года, калі беларусам, якія пратэстуюць, трэба было дапамагчы не словамі глыбокай заклапочанасці, а магутным знешнім ціскам на рэжым – і калі гэты момант быў выпушчаны. Я не хачу перакладаць адказнасць з беларускага народу на вонкавыя сілы. Не здымаю адказнасць з сябе, з Аб’яднанага пераходнага кабінета. Але хачу нагадаць, што праблема Лукашэнкі ўжо даўно перарасла межы Беларусі. І зараз гэта наша агульная адказнасць», – заявіў кіраўнік НАУ.
Паводле яго слоў, Лукашэнка – гэта менавіта тое «слабое месца глабальнай праблемы, выдаліўшы якое, можна паскорыць крах імперскіх амбіцый Расеі. І гэта менавіта той прыклад, калі замест прафілактыкі, патрэбна хірургічнае ўмяшанне. У свету ёсць усе неабходныя прылады. Засталося толькі выкарыстоўваць іх».
Латушка таксама дадаў, што можа быць, пазбавіўшы Пуціна ягонага саюзніка і беларускага плацдарму, можна будзе дапамагчы Украіне перамагчы значна хутчэй.
Алена Рувіна belsat.eu
