Суд Першамайскага раёну Менску завочна арыштаваў на 10 содняў Сяргея Бандарэнку, паведамляюць крыніцы «Белсату». Таксама ў яго канфіскавалі тэлефон.
Сяргей Бандарэнка ёсць стрыечным братам байца палка імя Кастуся Каліноўскага Васіля Парфянкова, які загінуў у баі ва Украіне. Падставаю для адміністратыўнай справы сталі здымкі з братам, якія сілавікі пабачылі ў мабільным тэлефоне Сяргея, а таксама знойдзеная нацыянальная беларуская сімволіка.
Нагадаем, напрыканцы кастрычніка міліцыянты затрымалі Сяргея Бандарэнку ў ягонай кватэры. Ён сцвярджае, што яго збівалі міліцыянты дарогаю ў ІЧУ і самі завезлі ў шпіталь хуткай дапамогі. Пасля таго, як сілавікі прагледзелі яго мабільны тэлефон, яны звязаліся з супрацоўнікамі ГУБАЗіКу. Пазней сілавікі распаўсюдзілі відэа з затрыманым Бандарэнкам, у якім абразліва падкрэслівалі, што «гэты маргінальны распаўсюднік экстрэмізму ёсць братам ліквідаванага найміта з атраду імя павешанага паляка».
Сяргей Бандарэнка пакінуў шпіталь і неўзабаве выехаў у Польшчу.
Любоў Лунёва belsat.eu