Еўрадэпутат ад Літвы і пастаянны дакладчык аб Беларусі Пятрас Аўштравічус заявіў у інтэрв’ю «Голасу Амерыкі» заявіў, што яму «цяжка ўявіць, што ў хуткім часе можна спадзявацца на прызнанне» пашпарта «новай Беларусі», хоць сама ідэя яму падабаецца. На заяву Аўштравічуса адказаў прадстаўнік Аб’яднанага пераходнага кабінету Валер Кавалеўскі.
Свае засцярогі наконт прызнання пашпарта новай Беларусі Пятрас Аўштравічус звязвае з тым, што для ўвядзення пашпарта адсутнічаюць такія элементы, як «суверэнітэт і тэрытарыяльная цэласнасць для гэтага дакументу».
«Я ўпэўнены, што з юрыдычнага гледзішча і ўсіх іншых фактараў, якія вядуць да прызнання таго ці іншага пашпарта, адсутнічае шмат розных складнікаў, у тым ліку – суверэнітэт і тэрытарыяльнасць для гэтага дакументу», – сказаў еўрадэпутат.
На ягоную думку, калі асобная краіна Захаду захоча прызнаць такі пашпарт, яна павінна будзе ўлічыць шматлікія аспекты, якія на цяперашні момант недапрацаваныя.
«Сама ідэя мне вельмі падабаецца, і я хацеў бы прызнаць гэты пашпарт яшчэ ўчора. Але паколькі няма выразнага адказу аб ягоным суверэнітэце, вельмі цяжка ўявіць, што ў хуткім часе можна спадзявацца на прызнанне такога пашпарта. Я сам гаварыў з дыпламатамі, з кіраўнікамі апазіцыйнага руху і думаю, што трэба ісці больш практычным шляхам – выдачы дакументаў для просьбітаў палітычнага прытулку», – падкрэсліў Аўштравічус.
Выданне «Позірк» звярнулася да прадстаўніка ў замежных справах Аб’яднанага пераходнага кабінету Беларусі Валера Кавалеўскага з просьбай пракаментаваць заяву Аўштравічуса.
Паводле яго, падставаў для прызнання пашпарта «новай Беларусі» больш, чым дастаткова, і Кавалеўскі адзначае, што дэмсілы прапаноўваюць рашэнне, здольнае «захаваць суб’ектнасць беларускага народу, а гэта акурат і ёсць асновай суверэнітэту».
«Што датычыць тэрытарыяльнай прыналежнасці, то ёсць пашпарты Мальтыйскага ордэну, які не валодае сваёй тэрыторыяй, ёсць пашпарты, якія выдаюцца міжнароднымі арганізацыямі. Аднак яны прызнаюцца многімі краінамі, у тым ліку і Літвой», – пракаментаваў Валер Кавалеўскі.
Нагадаем, што ў лістападзе 2023 года Святлана Ціханоўская паведаміла, што Аб’яднаны пераходны кабінет купляе матэрыялы, неабходныя на вытворчасць першых узораў пашпарта. Праект новага нацыянальнага пашпарта быў анансаваны прадстаўнікамі Аб’яднанага пераходнага кабінету ў жніўні 2023 года падчас канферэнцыі «Новая Беларусь» у Варшаве.
Раман Шавель belsat.eu
