На Маскоўскай лініі менскага метро спыніліся цягнікі. Як паведамляе падземка ў сваім Telegram-канале, гэта здарылася праз няспраўнасць цягніка. У мінулую суботу, 27 траўня, рух на сіняй лініі спыняўся праз інцыдэнт з пасажырам.
Руху на першай лініі менскага метро не было паўгадзіны. Цягнікі спыніліся а 10:30 праз паломку аднаго з іх. Дзеля ўзнаўлення руху «прымаліся неабходныя захады». Аб 11-й гадзіне праблему развязалі.
«Метрапалітэн працуе ў штатным рэжыме. Менскі метрапалітэн просіць прабачэння ў пасажыраў за нязручнасці», – гаворыцца ў допісе ў Telegram-канале падземкі.
У мінулую суботу, 27 траўня, таксама спыняўся рух на Маскоўскай лініі. Тады прычынаю стаўся «інцыдэнт з пасажырам» на станцыі «Плошча Леніна». Што там здарылася – выпадковае падзенне на рэйкі або спроба самагубства, – не ўдакладнялася.
Сяргей Крот belsat.eu
