З 4 чэрвеня ў Беларусі зменяцца правілы выкарыстання беспілотнікаў. Да дзейных абмежаванняў дададуцца новыя: забарона на палёты незарэгістраваных дронаў і абавязковы курс навучання, піша «Office Life».
Раней у Беларусі ўхвалілі забарону на палёты беспілотнікаў над гарадамі, абавязалі ўзгадняць выкарыстанне апаратаў з «Белаэранавігацыяй», а пры неабходнасці здымкаў з паветра – атрымоўваць дазвол у Генштабе міністэрства абароны.
Яшчэ ў леташнім кастрычніку дэпартамент цывільнай авіяцыі зацвердзіў адмысловыя правілы, што тычацца дзяржаўнага ўліку і эксплуатацыі беспілотнікаў. Інструкцыя набудзе моц 4 чэрвеня.
Ад заўтрашняга дня палёты дазваляюцца толькі зарэгістраваным дронам. Норма не тычыцца некаторых маленькіх апаратаў з невялікай максімальнай хуткасцю. Каб атрымаць уліковы нумар, трэба звярнуцца ў дэпартамент авіяцыі з дакументамі, што сведчаць асобу, права ўласнасці ды маюць тэхнічныя характарыстыкі беспілотніка. Працэдура бясплатная. Самаробныя дроны не рэгіструюць.
Таксама з 4 чэрвеня дазваляецца карыстацца беспілотнікамі толькі тым, хто атрымаў сертыфікат навучання. Адмысловыя курсы ладзяць тры ўстановы: ДТСААФ, Беларускі тэхналагічны ўніверсітэт і Нацыянальная акадэмія цывільнай авіяцыі. Навучанне доўжыцца тры дні і каштуе 230 – 250 рублёў. Кожныя 5 гадоў трэба праходзіць перападрыхтоўку.
Пры выкананні палёту аператару патрабуецца мець копіі пасведчання аб рэгістрацыі квадракоптара і сертыфікату аб навучанні.
Раней намеснік кіраўніка ДТСААФ Сяргей Петрусёў тлумачыў, што прасіць у Мінабароны дазвол на аэрафотаздымкі неабходна, калі камера знаходзіцца на адмысловым падвесе беспілотніка. Калі ж камера ўбудаваная, то фармальна гэта не лічыцца аэрафотаздымкамі, і такі запыт не патрабуецца.
Сяргей Крот belsat.eu
