Гомельскі абласны суд 3 жніўня агучыў прысуд журналістцы TVP Ірыне Слаўнікавай, якую трымаюць за кратамі з 30 кастрычніка мінулага года.
Суддзя Мікалай Доля, які раней вынес прысуд у «справе Ціханоўскага», прысудзіў журналістцы 5 гадоў калоніі. Пры гэтым дзяржаўны абвінаваўца прасіў на год менш.
Журналістку прызналі вінаватай паводле двух артыкулаў Крымінальнага кодэксу: арт. 342 («Арганізацыя і рыхтаванне дзеянняў, што груба парушаюць грамадскі парадак, або актыўны ўдзел у іх») і арт. 361.1 («Стварэнне экстрэмісцкага фармавання, або ўдзел у ім»).
Суд над Ірынай Слаўнікавай праходзіў у закрытым рэжыме.
2 жніўня беларускія журналісты правялі акцыю каля сядзібы прадстаўніцтва Еўракамісіі ў Варшаве, падчас якой накіравалі петыцыю з просьбай увесці санкцыі супраць тых, хто мае дачыненне да пераследу журналістаў у Беларусі.
Якуб Хруст belsat.eu