Сусветная арганізацыя здароўя (САЗ) рэкамендавала новую вакцыну R21/Matrix-M для прафілактыкі малярыі ў дзяцей. Гэта другая вакцына супраць малярыі, рэкамендаваная САЗ пасля вакцыны RTS, S/AS01, якая атрымала рэкамендацыю ў 2021 годзе.
«Абедзве вакцыны даказалі сваю бяспеку і эфектыўнасць у прафілактыцы малярыі ў дзяцей, і пры шырокім ужыванні, чакаецца, што гэта акажа вялікі ўплыў на здароўе насельніцтва», – заявілі ў САЗ.
Малярыя – захворванне, якое перадаецца камарамі. Найбольш ад яго пакутуюць дзеці ў Афрыцы, дзе штогод ад гэтай хваробы паміраюць амаль паўмільёна дзяцей.
Попыт на вакцыны супраць малярыі беспрэцэдэнтны; аднак даступная прапанова RTS,S абмежаванае. САЗ чакае, што даданне R21 у спіс рэкамендаваных вакцын супраць малярыі забяспечыць дастатковую колькасць запасаў вакцыны для ўсіх дзяцей, якія жывуць у раёнах, дзе малярыя ўяўляе сабой рызыку для грамадскага здароўя.
«Як даследнік малярыі, я марыў пра той дзень, калі ў нас з’явіцца бяспечная і эфектыўная вакцына супраць малярыі. Цяпер у нас іх дзве», – заявіў генеральны дырэктар САЗ Тэдрас Гебрэесус.
Ён дадаў, што попыт на вакцыну RTS,S нашмат перавышае прапанову, таму другая вакцына зʼяўляецца жыццёва важным дадатковым інструментам, які дазваляе «хутчэй абараніць больш дзяцей і наблізіць нас да нашага бачання будучыні без малярыі».
У сваю чаргу Матшыдыса Моэці, рэгіянальны дырэктар САЗ у Афрыцы, падкрэсліў, што другая вакцына валодае «рэальным патэнцыялам для ліквідацыі вялізнага разрыву паміж попытам і прапановай».
«Абедзве вакцыны, пастаўленыя ў вялікіх маштабах і шырока распаўсюджаныя, могуць дапамагчы ўмацаваць намаганні па прафілактыцы і барацьбе з малярыяй і выратаваць сотні тысяч маладых жыццяў у Афрыцы ад гэтай смяротнай хваробы», – сказаў ён.
САЗ таксама выпусціла рэкамендацыі SAGE па новых вакцынах ад дэнге і менінгіту, а таксама графік імунізацыі ад COVID-19 і поліяміэліту.
Нобэлеўскую прэмію ў галіне медыцыны сёлета прысудзілі за даследаванні, што дапамаглі стварыць эфектыўную вакцыну ад COVID-19.
Якуб Хруст belsat.eu