Прэзідэнт Украіны Уладзімір Зяленскі наведаў з працоўным візітам Бучу. Зяленскі сустрэўся з вайсковымі і мясцовымі жыхарамі населенага пункта, чыю назву да вайны мала хто ведаў нават у самой Украіне, але цяпер горад вядомы ва ўсім свеце як месца ў якім выяўлены сведчанні масавых забойстваў мірных жыхароў. Зяленскі адказаў на пытанне журналіста BBC ці бачыць ён магчымым далейшы працяг мірных перамоў з Расейскай Федэрацыяй.
Прэзідэнт Зяленскі адзначыў, што Расея здзейсніла ваенныя злачынствы і генацыд ва Украіне. Аднак ён мяркуе, што працяг перамоў усё яшчэ магчымы:
«Так, таму што Украіна павінна здабыць мір. Мы ў Еўропе 21 стагоддзя. Мы працягнем дыпламатычныя і ваенныя намаганні».
Таксама Зяленскі адзначыў, што Украіна заклікае міжнародную супольнасць пачаць працэс незалежнага і аб’ектыўнага расследавання ваенных злачынстваў у Бучы, Марыупалі і іншых гарадах Украіны.
Нагадаем, што заўчора ЗСУ паведаміла, што ўзяла пад кантроль тэрыторыю Кіеўскай вобласці. Украінскі бок выявіў масавыя забойствы і катаванні мірнага насельніцтва з боку расейскіх вайскоўцаў. Расея дагэтуль не прызнае датычнасці сваіх вайскоўцаў да масавых забойстваў у Бучы. Кіраўнік МЗС Расеі Сяргей Лаўроў у панядзелак назваў апублікаваныя сведчанні пастановачнымі.
Раздача гуманітарнай дапамогі жыхарам Бучы, Украіна. 2 красавіка 2022 года. Фота: МП / Белсат
Таксама Уладзімір Зяленскі выказаўся адносна сітуацыі ў Марыупалі. Зяленскі адзначыў, што становішча ЗСУ каля гораду застаецца надзвычай складаным. На дадзены момант украінскія вайскоўцы не маюць магчымасць зняць блакаду гораду ці эвакуяваць усё мірнае насельніцтва.
ХЗ belsat.eu