Еменская групоўка «Ансар Алах» абвесціла пра пачатак «чацвертай фазы эскалацыі» сваёй барацьбы з Ізраілем і ЗША.
Прадстаўнік групоўкі «Ансар Алах» Ях’я Сары паведаміў, што хусіты гатовыя атакаваць караблі, якія накіроўваюцца ў парты акупаванай Палестыны праз Міжземнае мора, у любым даступным раёне ў межах дасяжнасці.
Раней дзеянні хусітаў абмяжоўваліся Чырвоным морам і Адэнскім залівам.
У «Ансар Алах» падкрэсліваюць, што калі Ізраіль распачне ваенную аперацыю ў Рафаху, хусіты будуць нападаць на ўсе караблі, якія маюць дачыненне да паставак і ўваходу ў акупаваныя палестынскія парты, незалежна ад нацыянальнасці і іх прызначэння.
Нагадаем, праіранская групоўка «Ансар Алах», якая кантралюю значную частку Емена, восенню 2023 года абвесціла баявую аперацыю на «падтрыманне палестынскага народу» і пачала чыніць рэгулярныя напады на марскія камунікацыі, каб прымусіць Ізраіль адмовіцца ад ваеннай аперацыі ў сектары Газа. За чатыры месяцы ў Чырвоным моры і Адэнскім заліве былі атакаваныя дзясяткі міжнародных караблёў, што прывяло до вялікага збою ў марскіх перавозках.
У адказ на гэтыя дзеянні ЗША і Вялікая Брытанія са студзеня 2024 году пачалі наносіць ракетна-бомбавыя ўдары па вайсковых аб’ектах у Емене. Аднак аперацыя саюзнікаў не прымусіла хусітаў спыніцца.
Глеб Нержын belsat.eu
