10 мільярдаў расейскіх рублёў, або каля 112 мільёнаў долараў у эквіваленце, знойдзеныя пры ператрусах у Санкт-Пецярбурзе, вярнулі кіраўніку ПВК Вагнэра Яўгенію Прыгожыну. Пра гэта паведамляе «Фонтанка».
10 мільярдаў расейскіх рублёў, сотні тысяч долараў і 5 зліткаў золата знайшлі ў машынах падчас ператрусаў у Санкт-Пецярбурзе 24 чэрвеня – у дзень, калі Яўгеній Прыгожын учыніў у Расеі вайсковы мяцеж. Сам кіраўнік ПВК тады заяўляў, што грошы прыгатаваныя на заробак баевікам і выплаты сваякам загінулых.
Паводле інфармацыі выдання «Фонтанка», да 2 ліпеня Прыгожыну вярнулі ўсю суму і каштоўнасці. Аднак на самой працэдуры ён не прысутнічаў. Замест яго прыехаў ягоны кіроўца з даверанасцю.
Тым часам «Ведомости» паведамляюць, што агульныя выдаткі на ПВК з расейскага бюджэту маглі перавысіць 1,7 трыльёна расейскіх рублёў з 2014 года. Вагнэраўцы ў рамках заключаных з дзяржавай кантрактаў атрымалі крыху больш за 858 мільярдаў расейскіх рублёў. Паводле іншых кантрактаў, прыгожынскі холдынг «Канкорд» аказаў паслуг яшчэ на 845 мільярдаў расейскіх рублёў.
Якуб Хруст belsat.eu