Следчыя Гарадзенскага міжраённага аддзелу СК за выходныя пачалі дзве крымінальныя справы аб парушэнні правілаў тэхнікі бяспекі, якое пацягнула смерць і цяжкія пашкоджанні (часткі 1 і 2 артыкулу 306 КК), у звязку з гібеллю працаўніка гарадзенскага «Азоту» і траўмаваннем двух падрадчыкаў у адным з цэхаў прадпрыемства, паведамляе прэс-служба ведамства.
Усё адбылося за апошнія тры дні.
Паводле звестак следства, удзень 2 верасня пры выкананні рамонтных працаў у цэху «Горадня Азоту» пацярпеў 40-гадовы рабочы адной з будаўнічых арганізацыяў Горадні. «Мужчына выконваў работы без атрымання неабходнага на іх правядзенне допуску, цяпер ён у рэанімацыі», – пішуць у ведамстве.
Пачалі крымінальную справу паводле ч. 1 арт. 306 КК («Парушэнне правілаў аховы працы, якое пацягнула праз неасцярожнасць прычыненне цяжкага цялеснага пашкоджання»).
Яшчэ адзін няшчасны выпадак здарыўся ўначы 4 верасня. Паводле следства, 48-гадовы рабочы гарадзенскага «Азоту» пры выкананні дэфектаскапіі ў спускавым кошыку на вышыні каля 19 метраў упаў разам з ім на дно калоны. Ад цяжкіх траўмаў мужчына памёр на месцы.
У момант здарэння мужчына не быў прышпілены ахоўным поясам. Газета «Гродненский химик» таксама паведамляла імя загінулага – Уладзімір Дарашэнка.
Следчыя Гарадзенскага міжраённага аддзелу СК завялі крымінальную справу паводле ч. 2 арт. 306 КК («Парушэнне правілаў аховы працы, якое прывяло праз неасцярожнасць да смерці чалавека»).
Алена Рувіна belsat.eu
