Долар тры дні запар абнаўляе гістарычны максімум. Заўтра, паводле курсу Нацбанку, ён будзе каштаваць 3,3376 рубля. Эканамістка Настасся Лузгіна не ўбачыла ў гэтым нічога надзвычайнага. Яна сказала «Белсату», што долар апошнімі днямі даражэе да шмат якіх валютаў, а ад рэзкай дэвальвацыі Беларусь мусяць уратаваць… прэзідэнцкія выбары ў Расеі.
Долар дэманструе ў Беларусі цудоўную форму і расце чатыры дні запар. За гэты час амерыканская валюта абнавіла тры гістарычных рэкорды.
Папярэдні максімум быў дасягнуты ў леташнім сакавіку на фоне эканамічнага шоку пасля расейскага ўварвання ва Украіну. Тады долар каштаваў 3,3195 рубля. Цяпер – новы пік: за чатыры дні амерыканская валюта падаражэла на 0,0525 рубля і цяпер каштуе 3,3376 рубля. Ад пачатку года беларускі рубель дэвальваваўся да долара на 22%.
Еўра таксама расце, аднак пакуль леташні гістарычны максімум не пераадолены. Тады на піке ён каштаваў 3,6670 рубля, цяпер – 3,5068. Сёлета найвышэйшы курс еўра быў зафіксаваны ў сярэдзіне жніўня: 3,5753 рубля.
«Нічога асаблівага не адбываецца», – заявіла «Белсату» старэйшая навуковая працаўніца даследчага цэнтру BEROC Настасся Лузгіна. Яна растлумачыла, што долар апошнімі днямі расце да шмат якіх валютаў:
«Амерыканскі рэгулятар, Федэральная рэзервовая сістэма, ладзіць жорсткую грашова-крэдытную палітыку, і долар на сусветным рынку добра пачуваецца. Ён расце да многіх валютаў цяпер».
Беларускі рубель вельмі моцна прывязаны да расейскага і плюс-мінус рушыць тым жа курсам.
«Больш за 50% аб’ёму таргоў на Беларускай валютна-фондавай біржы – у расейскіх рублях, і натуральна, што гэта адбіваецца на беларускім рублі. Гэта наўпроставае ўздзеянне вонкавага валютнага рынку, расейскага рубля. Калі будзе павялічвацца доля разлікаў у расейскіх рублях, адпаведна, гэтая залежнасць будзе толькі ўзрастаць. Мы, вядома, не капіюем цалкам, але паўтараем дынаміку», – адзначыла эканамістка.
Лузгіна канстатавала, што расейскі рубель, які прычэпам цягне за сабою беларускі, цяпер не ў лепшым стане, і ва ўладаў суседняй краіны пакуль не атрымліваецца ўмацаваць сваю валюту.
«Ціск на расейскі рубель захоўваецца. Валюта не паступае своечасова ў Расею ці экспарцёры яе нават не заводзяць у краіну. Калі расейскія ўлады не будуць уводзіць нейкіх дадатковых абмежаванняў, то рубель можа яшчэ аслабнуць», – сказала экспертка, падкрэсліўшы, што, хутчэй за ўсё, нейкія захады ўсё ж будуць, бо на носе прэзідэнцкія выбары ў Расеі.
Суразмоўца «Белсату» мяркуе, што ў суседняй краіне будуць намагацца трымаць курс не вышэй за 100 расейскіх рублёў за долар мінімальна да галасавання, якое мусіць адбыцца ў сярэдзіне сакавіка налета. «Адпаведна, гэта будзе стабілізаваць і беларускі рубель», – канстатавала Лузгіна. Цяпер, паводле курсу расейскага Цэнтральнага банку, долар каштуе там 99,6762 рубля.
Пры гэтым неспадзяванка на беларускім валютным рынку можа адбыцца і праз унутраныя чыннікі, зазначыла эканамістка цэнтру BEROC. Тут небяспеку нясе адмоўнае сальда вонкавага гандлю: Беларусь стала купляць болей імпарту, чымся прадаваць за мяжу.
«У нас пагаршаецца сальда гандлёвага балансу, і калі гэтая тэндэнцыя будзе захоўвацца, то ўжо не вонкавыя валютныя рынкі будуць уплываць, а менавіта ўнутраны. Маюцца рызыкі зніжэння курсу беларускага рубля ў дачыненні да ўсіх валютаў», – папярэдзіла экспертка.
Пакуль жа дэфіцыту валюты ў Беларусі няма: фізічныя асобы, а таксама нерэзідэнты здаюць болей, чымся купляюць.
«Пакуль баланс захоўваецца. Як доўга гэта будзе – пытанне, але ў бліжэйшыя месяцы, мяркую, будзе захоўвацца. І асноўным чыннікам па-ранейшаму застаецца сітуацыя з расейскай валютаю», – падсумавала Настасся Лузгіна.
Сяргей Крот belsat.eu