Больш за 1300 чалавек загінулі і тысячы атрымалі раненні ў выніку землятрусу, што 6 лютага адбыўся на памежжы Турцыі і Сірыі. Пра гэта паведамляе «Reuters».
Прэзідэнт Турцыі Таіп Эрдаган заявіў, што загінулі 912 асобаў, 5383 атрымалі раненні, 2818 будынкаў абрынуліся. Ён не можа прадказаць, наколькі ўзрасце колькасць ахвяраў, бо пошукава-ратавальныя працы працягваюцца.
Міністэрства аховы здароўя Сірыі заявіла, што больш за 326 чалавек загінулі і 1042 былі параненыя. Ратавальнікі ў раёнах Сірыі, што пад кантролем паўстанцаў, кажуць пра 147 загінулых.
Моцныя пашкоджанні і ў турэцкім горадзе Газі’Антэпе. Штуршкі адчуваліся таксама на Кіпры і ў Ліване, дзе паведамлялі пра разбурэнні.
Паводле Геалагічнай службы ЗША, землятрус адбыўся на глыбіні 17,9 км і меў магнітуду 7,8. Паведамляюць пра серыю штуршкоў, адзін з іх быў магнітудаю 6,7.
«Спалучэнне вялікай магнітуды і малой глыбіні зрабіла гэты землятрус надзвычай разбуральным», – сказаў Мугамэд Кашані, дацэнт кафедры структурнай і сейсматрывалай інжынерыі Саўтгэмптанскага ўніверсітэту.
Гэта быў наймацнейшы землятрус у Турцыі з 1999 года, піша «Reuters». Тады землятрус аналагічнай моцы разбурыў Ізміт і густанаселены ўсходні рэгіён Мармуровага мора недалёка ад Стамбулу, у выніку чаго загінулі больш як 17 тысячаў чалавек. У сваю чаргу прэзідэнт Турцыі Эрдаган назваў землятрус наймацнейшым з 1939 года.
A new #earthquake of the magnitude 7.8 occurred in #Turkey News Reporter Running and Screaming #TurkeyEarthquake pic.twitter.com/5sRtxaBB3Q
— Amit Sahu🇮🇳 (@amitsahujourno) February 6, 2023
Якуб Хруст belsat.eu
