Пасля 15 содняў арышту грамадскі актывіст Зміцер Дашкевіч не выйдзе на волю – ён стаў падазраваным у крымінальнай справе аб арганізацыі і падрыхтоўцы пратэстаў.
Пра гэта паведаміла жонка актывіста Наста Дашкевіч.
«Званіў следчы з СК. Зміцер арыштаваны паводле 342 ч. 1. Заўтра не выйдзе», – паведаміла Наста Дашкевіч.
Яго абвінавачваюць паводле арт. 342 КК РБ «Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх».
Змітра Дашкевіч затрымалі перад Днём Волі 23 сакавіка. Тады ў сям’і прайшоў ператрус, канфіскавалі тэхніку, а Змітра забралі «людзі ў чорным». На наступны дзень Дашкевічу прысудзілі 15 содняў арышту за тое, што ён нібыта адмаўляўся адамкнуць дзверы кватэры, хоць людзі ў балаклавах сустрэлі яго на лесвічнай пляцоўцы.
У сярэдзіне сакавіка Змітра Дашкевіча і ягоную цяжарную жонку Насту выклікалі на допыты ў справе аб пратэстах 2020 года. Нягледзячы на магчымы крымінальны пераслед яны заставаліся ў Беларусі. Сям’я гадуе трох дзяцей.
АД belsat.eu
