Колькасць расейскіх турыстаў вырасла ў Беларусі за пяць месяцаў 2023 года на 173 % у параўнанні з аналагічным паказнікам за мінулы год. Пра гэта паведаміла дырэктарка дэпартаменту па турызме Міністэрства спорту і турызму Беларусі Ірына Варановіч.
«З Расейскай Федэрацыі за перыяд са студзеня да траўня 2023 года тэмп росту наведванняў павялічыўся на 173 працэнты, гэта даволі высокія лічбы… Мы бачым развіццё не толькі з Масквой і Санкт-Пецярбургам», – паведаміла Ірына Варановіч на прыёме дэлегацыі з Наўгародскай вобласці.
Чыноўніца паінфармавала таксама, што напаўняльнасць беларускіх санаторыяў складае 91 %.
У беларускіх санаторыях, паводле Варановіч, адпачывае на сёння 5 тысяч расейскіх грамадзян. Сцвердзіла, што «абароты набірае» і прамысловы турызм.
Раней намеснік міністра спорту і турызму Беларусі Алег Андрэйчык паведамляў, што ў 2022 годзе расейцы складалі 96 % усіх турыстаў, якія наведалі Беларусь летась.
Зміцер Міраш belsat.eu
