Палітзняволены гарадзенскі панк-музыка і актывіст Ігар Банцэр змешчаны ў штрафны ізалятар на 10 содняў «за парушэнне рэжыму».
Паводле інфармацыі «Белсату», на гэтым тыдні на Ігара Банцэра ўзмацніўся ціск з боку адміністрацыі «хіміі» ў Віцебску, дзе ён цяпер адбывае пакаранне. Напрыклад, нагодаю для адной з вымоваў стала тое, што ён кепска пагаліўся. Гучалі адкрытыя пагрозы, што музыка займее праблемы і паедзе на «зону».
Ціск апошнімі днямі адчуў не толькі ён, але і іншыя палітвязні, якія адмовіліся ад прапановы Юрыя Васкрасенскага пісаць лісты аб памілаванні на імя Лукашэнкі.
Ігар Банцэр адбывае пакаранне на «хіміі» за вулічны перформанс. За танец у стрынгах перад міліцэйскім аўтамабілем яго адправілі ў папраўчую ўстанову адкрытага тыпу на 1,5 года. Пакуль ішоў суд, каб абараніць свае правы за кратамі, Ігар трымаў 16-дзённае сухое галадаванне. За грубыя парушэнні рэжыму яго могуць накіраваць у турму.
СП belsat.eu