Выканаўчы камітэт Сусветнага веславання пастанавіў дазволіць некаторым беларускім і расейскім веслярам прымаць удзел у міжнародных спаборніцтвах у якасці індывідуальных нейтральных спартоўцаў на будучым чэмпіянаце свету, паведамляе сайт федэрацыі.
Пасля расейскага ўварвання ва Украіну выканкам Сусветнага веславання пастанавіў прыпыніць удзел расейскіх і беларускіх спартоўцаў і афіцыйных асобаў у спаборніцтвах Сусветнага веславання. Гэтая пастанова, якая вынікала з першапачатковых рэкамендацый Міжнароднага алімпійскага камітэта (МАК), захавалася дагэтуль.
Тым не менш арганізацыя стварыла працоўную групу, распрацавала нарматыўную і аператыўную базу, якая дазволіла б некаторым спартоўцам з Беларусі і Расеі прымаць удзел у спаборніцтвах. У выніку вырашылі дапусціць спартоўцаў і афіцыйных асобаў з Беларусі для ўдзелу ў якасці нейтральных асобаў у некаторых спаборніцтвах у бягучым годзе.
Гэтых асобаў будуць правяраць, каб пераканацца, што яны не звязаныя з вайной ва Украіне або публічна не падтрымліваюць яе ў любой форме, і ўзмацнілі працэс антыдопінгавага кантролю ў дачыненні да іх.
Алена Аляксандрава belsat.eu
