Дарадца кіраўніка Офісу прэзідэнта Украіны Міхайла Падаляк выказаў незадаволенасць тым, што Нобэлеўскай прэміяй міру ўганаравалі сёння разам з украінскай арганізацыяй прадстаўнікоў Беларусі і Расеі.
«У Нобэлеўскага камітэту адназначна цікавае разуменне слова «мір», калі Нобэлеўскую прэмію атрымліваюць разам прадстаўнікі дзвюх краінаў, якія напалі на трэцюю», – пракаментаваў рашэнне Нобэлеўскага камітэту Міхайла Падаляк на сваёй старонцы ў Twitter.
У Нобелівського комітету однозначно цікаве розуміння слова «мир», якщо @NobelPrize разом отримують представники двох країн, що напали на третю. Ані російські, ані білоруські організації так і не змогли організувати спротив цій війні. Нобель цього року просто «супер».
— Михайло Подоляк (@Podolyak_M) October 7, 2022
«Ані расейскія, ані беларускія арганізацыі так і не змаглі зладзіць супраціву гэтай вайне. Нобэль гэтага года – проста супер», – напісаў дарадца кіраўніка Офісу прэзідэнта Украіны.
Тўіт Міхайла Падаляка выклікаў шквал каментароў. Каментатары з Беларусі і Украіны нагадваюць аўтару, што Алесь Бяляцкі быў арыштаваны яшчэ ў ліпені 2021 года, а праваабарончая арганізацыя «Вясна» сышла ў падполле і ніяк не магла арганізоўваць антываеннага супраціву ў 2022 годзе. Нагадваюць Падаляку, што Нобэль далі не краіне, і «гэта не «Еўрабачанне».
Шановний пане Михайле, дозвольте нагадати вам про ваш журналістський досвід у Білорусі, суд та депортацію фактично за критичну публікацію про Лукашенка. Вам як нікому іншому добре відомо, чого варто бути правозахисником у Білорусі. Дуже гірко, що ви це знецінюєте.
— Aksana (@AnaskoBro) October 7, 2022
Прадстаўнікі ўкраінскага Цэнтру грамадзянскіх свабодаў, які таксама атрымаў Нобэлеўскую прэмію міру, кажуць, што цяпер якраз і загаварылі гарматы, бо раней палітыкі не прыслухоўваліся да праваабаронцаў і змагароў за мір, якім безумоўна ёсць Алесь Бяляцкі.
Нобэлеўскую прэмію міру атрымалі сёлета беларускі праваабаронца Алесь Бяляцкі, які застаецца за кратамі ўжо 450 дзён, расейская праваабарончая арганізацыя «Мемарыял» і Цэнтр грамадзянскіх свабодаў з Украіны.
Зміцер Міраш belsat.eu