ЖКГ Менскай вобласці абвесціла пра пачатак ацяпляльнага сезону, піша БелТА. Адпаведнае рашэнне было прынятае Менскім аблвыканкамам 6 кастрычніка.
У першую чаргу ацяпленне будзе ўключанае ў аб’ектах сацыяльнай інфраструктуры – школах, дзіцячых садках, лякарнях. Пазней цяпло прыйдзе і ў жылы сектар – калі цягам трох дзён сярэдняя тэмпература паветра пратрымаецца не вышэй за +8°С.
Міністэрства энергетыкі Беларусі адзначала, што раней ацяпляльны сезон распачынаўся ў кастрычніку ў 2020 годзе. У 2021 і 2022 гадах ацяпленне ўключалі ўжо ў верасні.
Папярэдні ацяпляльны сезон у Беларусі пачаўся 20 верасня 2022 года, скончыўся 17 красавіка 2023 года, і такім чынам доўжыўся амаль 7 месяцаў.
Сёлета верасень выдаўся вельмі гарачым. Шмат у якіх раёнах Беларусі былі пабітыя тэмпературныя рэкорды за ўсю гісторыю назіранняў за надвор’ем.
Марыя Міхалевіч belsat.eu