Некалькі тыдняў Камітэт дзяржаўнай бяспекі праводзіць арышты афіцэраў цэнтральнага апарату Дэпартаменту фінансавых расследаванняў Камітэту дзяржаўнага кантролю і ўпраўлення ў Менску і Менскай вобласці. Пра гэта паведамляе «Наша Ніва» са спасылкай на трох інфармаваных суразмоўцаў.
Затрыманні праходзяць у рамках расследаванняў спраў паводле артыкулаў 430 («Атрыманне хабараў») і 424 («Перавышэнне службовых паўнамоцтваў») КК. Затрыманыя больш як 20 асобаў.
«Пачалося як звычайна: узялі аднаго дзеяча з менскага ўпраўлення з хабарам ад прадпрымальніка за «вырашэнне пытанняў». Той пачаў здаваць іншых. Так і раскручваецца. Моцна прарадзілі менскае ўпраўленне, цяпер ідуць па цэнтральным апараце. Затрымлівае КДБ», – паведаміў суразмоўца выдання.
ДФР у тым ліку ўдзельнічае ў палітычных рэпрэсіях, сярод іншага ў дачыненні да TUT.by і «Белгазпрамбанку».
Беларусь заняла 98-е месца са 180 краін у індэксе ўспрымання карупцыі ад «Transparency International». Гэта на сем пазіцый ніжэй, чым годам раней, нягледзячы на разносы, якія Аляксандр Лукашэнка рэгулярна ладзіць чыноўнікам.
Якуб Хруст belsat.eu
