Еўразвяз заклікае Беларусь не ўдзельнічаць у расейскай агрэсіі і выконваць свае міжнародныя абавязальніцтвы.
«Расея пры ўдзеле рэжыму Лукашэнкі ў Беларусі ў якасці суагрэсара нясе поўную адказнасць за гібель людзей, траўмы і разбурэнні», – гаворыцца ў заяве, прынятай падчас спецыяльнага паседжання Пастаяннай Рады АБСЕ, якое адбылося ў Вене 7 сакавіка.
«Поўнамаштабная вайна прэзідэнта Пуціна супраць Украіны ёсць грубым парушэннем міжнароднага права і Статуту ААН і падрывае еўрапейскую і глабальную бяспеку і стабільнасць, – зазначаецца ў тэксце заявы. – Гістарычная рэзалюцыя ГА ААН на мінулым тыдні паказала, што міжнародная супольнасць згодна выступае супраць расейскай захопніцкай вайны».
Еўразвяз патрабуе ад Расеі «неадкладна спыніць свае ваенныя дзеянні, вывесці ўсе свае войскі з усёй тэрыторыі Украіны і цалкам паважаць тэрытарыяльную цэласнасць, суверэнітэт і незалежнасць Украіны ў межах яе міжнародна прызнаных межаў і тэрытарыяльных водаў», а таксама спыніць кампанію дэзынфармацыі і кібератакаў.
«Мы таксама паўтараем наш заклік да Беларусі не садзейнічаць расейскай агрэсіі і выконваць свае міжнародныя абавязальніцтвы. ЕЗ рашуча падтрымлівае неадʼемнае права Украіны на самаабарону, а таксама намаганні ўкраінскіх Узброеных сілаў для абароны тэрытарыяльнай цэласнасці і насельніцтва Украіны ў адпаведнасці з артыкулам 51 Статуту ААН», – гаворыцца ў заяве Рады АБСЕ.
ГГ, belsat.eu
