Дзень Перамогі-2021: нешматлюдныя імпрэзы ў сталіцы і затрыманні ў рэгіёнах

9 траўня ў Менску прайшлі ўрачыстасці з нагоды святкавання Дня Перамогі. Фотакарэспандэнт «Белсату» назіраў за афіцыйнай і неафіцыйнай часткамі праграмы.

Афіцыйная частка святкавання 76-ай гадавіны заканчэння Вялікай айчыннай вайны прайшла ў цэнтры сталіцы на плошчы Перамогі. Частка праспекту Незалежнасці, блізкая да месца афіцыйнай імпрэзы была перакрытая супрацоўнікамі сілавых структураў. Аб 11-ай гадзіне Аляксандр Лукашэнка з сынамі ўсклаў кветкі да мемарыялу Перамогі.

Пазней, як паведаміў карэспандэнт «Белсату», у Менску на плошчы Перамогі затрымалі актывістку Галіну Лагацкую. Цяпер яна ў Першамайскім РУУС, паводле супрацоўнікаў міліцыі, неўзабаве яна будзе накіраваная ў ІЧУ. За што яе затрымалі, невядома. Таксама паведамляецца пра затрыманні ў рэгіёнах.

Сярод удзельнікаў святочнай імпрэзы былі таксама прарасейскія актывісты, якія выйшлі з банерамі «Несмяротны полк» і партрэтамі Леніна ды Сталіна.

Частка святочных імпрэзаў у Менску прайшлі таксама каля Стэлы і Палацу спорту. Там жа прайшла і выстава сучаснай вайсковай тэхнікі.

Сёлета Дзень Перамогі адзначаецца на фоне глыбокага палітычнага крызісу. Улады плануюць а 23-яй гадзіне зладзіць салют, выкарыстоўваючы перадусім колеры дзяржаўнага сцяга. Дэмакратычныя актывісты заклікаюць сёння ў 23:34 выпускаць феерверкі ў памяць аб перамозе над фашызмам.

Фота АВ belsat.eu