Паліцыя на акупаваных Расеяй тэрыторыях Запарожскай вобласці ўжо кіруецца Крымінальным і Адміністрацыйным кодэксамі РФ, паведамляе расейскае агенцтва «РИА Новости» са спасылкай на прадстаўніка прарасейскай адміністрацыі рэгіёну Уладзіміра Рогава.
«Мы пачалі выкарыстоўваць заканадаўства Расейскай Федэрацыі ў розных сферах», – адзначыў чыноўнік.
Напярэдадні кіраўнік прарасейскай адміністрацыі Запарожскай вобласці Яўген Баліцкі падпісаў распараджэнне аб правядзенні рэферэндуму наконт далучэння да Расеі. Пры гэтым не паведамляецца, калі акупацыйныя войскі збіраюцца праводзіць разам з Крамлём «рэферэндум». Раней Баліцкі заяўляў, што плануе зрабіць гэта напачатку восені. Гаворка можа ісці пра расейскі адзіны дзень галасавання 11 верасня.
7 жніўня прэзідэнт Украіны Уладзімір Зяленскі заявіў, што ў выпадку правядзення псеўдарэферэндуму на акупаваных тэрыторыях поўдня Украіны Масква закрые любую магчымасць перамоваў з Кіевам.
Алена Рувіна belsat.eu