Канферэнцыю працягнуць на дварэ – каля гадзіны спатрэбіцца, каб праверыць памяшканне пасля паведамлення пра бомбу. Праз менш як 30 хвілін удзельнікаў запрасілі назад у залу – бомбу не знайшлі.
Апоўдні 9 жніўня канферэнцыю «Новая Беларусь» ў Вільні давялося прыпыніць: арганізатары атрымалі паведамленне пра закладзеную бомбу.
«Палітычны перформанс усё ж адбыўся», – пажартавала прадстаўніца Офісу Ціханоўскай Святлана Бабінцава.
Канферэнцыі не спынілі – праграму працягнулі на дварэ і паабяцалі вярнуцца ў залу, калі памяшканне правераць на выбухоўку. Адкуль паступіла паведамленне, не расказалі.
«Калі хтосьці лічыць, што гэта паўплывае на тыя пастановы, што найбліжэйшым часам мусяць быць агучаныя ў межах канферэнцыі – гэта не акажа ўплыву, – запэўніў Павел Латушка, лідар Народнага антыкрызіснага ўпраўлення. – У нас ёсць згуртаванасць, у нас ёсць энергія, у нас ёсць воля. Галоўнае – воля прыняць вызначыцца і рушыць далей да той мэты, якую мы паставілі.
Я практычна перакананы, што мэта таго, што цяпер адбываецца, гэта паспрабаваць адкласці вельмі важныя рашэнні, што могуць вызначыць будучыню нашай краіны і развіццё нашай дзяржавы».
Дарадца Святланы Ціханоўскай Франак Вячорка расказаў «Белсату» такую версію: пра бомбу маглі паведаміць тыя, хто баяцца рашэнняў канферэнцыі і стварэння кабінету з функцыяй альтэрнатыўнага ўраду.
«Мы чулі такую інфармацыю, што ўжо ў лукашэнкаўскім атачэнні ўсе перапужаліся, што дэмакратычныя сілы аб’ядналіся, – кажа Вячорка. – Нейкімі такімі дзіцячымі падставамі спрабуюць сарваць пагадненне, дамову».
Паведамленне атрымалі падчас дыскусіі аб праблемах беларускага бізнесу. Да таго паспелі правесці сесію пытанняў і адказаў.
У першы дзень канферэнцыі абмяркоўвалі шляхі выхаду з палітычнага крызісу, арганізацыю транзітнага перыяду, ратаванне ад эканамічнага крызісу і рэарганізацыю дэмакратычных сілаў. Папярэдне пагадзіліся на спробу стварыць альтэрнатыўны ўрад.
Праз менш як 30 хвілінаў удзельнікаў канферэнцыі запрасілі назад у залу.
Трансляцыя другога дня канферэнцыі працягваецца, але відэа перапынялася на час эвакуацыі.
Алесь Наваборскі belsat.eu
