Адразу некалькі крыніцаў паведамляюць пра затрыманні ў раёне Кунцаўшчыны ў Менску.
Паводле «Еўрарадыё», жыхары раёну выйшлі сёння раніцаю на марш пратэсту з бел-чырвона-белаю сімволікай. Некаторых з іх на вуліцы Прытыцкага жорстка затрымаў ГУБАЗіК.
Блогер Антон Матолька ў сваім тэлеграм-канале паведамляе пра затрыманні на лакальным маршы ў Кунцаўшчыне. Людзі ішлі з бел-чырвона-белымі сцягамі ў бок метро, калі з сіняга буса выбеглі сілавікі ў масках. «Заламалі, павялі ў аўта, аднаго чалавека павалілі на зямлю, затым ударылі нагою некалькі разоў», – піша Матолька.
Інфармацыю пра затрыманні ў Кунцаўшчыне пацвярджае тэлеграм-канал ГУБАЗіКу. Сілавікі выклалі відэа з адным з затрыманых пратэстоўцаў. Ён распавёў, што падпісаны на пратэставы тэлеграм-чат і сёння раніцай яны планавалі правесці акцыю пратэсту. Але фактычна адразу іх затрымалі. На відэа пратэстоўца прымушаюць стаяць з рукамі за галавою.
Чытачы «Белсату» падзяліліся падрабязнасцямі сённяшніх падзеяў:
«Сапраўды, сёння планаваўся міні-марш на 50 чалавек у раёне Кунцаўшчыны. Аднак удалося своечасова даведацца пра падыход слабавікоў. Супрацоўнікі былі ў разгубленым стане, відавочна, не чакалі нас убачыць, што дазволіла натоўпу скарыстацца сітуацыяй і рассяродзіцца. Затрыманыя адзінкі, якіх мы не ведаем. Ёсць падазрэнне, што спрабавалі схапіць хоць кагосьці, каб зусім не атрымаць па шапцы, таму там апынуліся незнаёмыя нам людзі».
ІІ belsat.eu
