Кіраўніца аб’яднанага прэс-цэнтру сілаў абароны аператыўнага камандавання «Поўдзень» Наталля Гумэнюк заявіла, што з пачатку актыўных дзеянняў ЗСУ на Херсонскім кірунку былі вызваленыя ад расейскай акупацыі больш за 1 70 км² украінскай тэрыторыі. Пра гэта паведамляе «Укрінформ».
«Станам на сённяшні дзень з пачатку актыўных дзеянняў вызваленыя больш як 1170 км² на Херсонскім кірунку. Працягваецца праца і ў замацаванні тэрыторыяў, і ў зачыстцы, правядзенні стабілізацыйных захадаў», – сказала Гумэнюк.
У той жа час яна падкрэсліла, што грамадзянам не варта спяшацца з вяртаннем на вызваленую тэрыторыю, бо захопнікі, адыходзячы, закладаюць міны ў будынках, аб’ектах інфраструктуры, на дарогах, палях. Акрамя таго, пры абстрэле разлятаюцца касетныя снарады.
Нагадаем, контрнаступленне ЗСУ на Херсонскім кірунку пачалося яшчэ ў канцы жніўня. Пасля вызвалення шэрагу населеных пунктаў прасоўванне ўкраінскіх вайскоўцаў застопарылася і большую частку верасня аперацыя абмяжоўвалася пазіцыйнымі баямі ды ўдарамі па расейскіх тылах. Аднак 2 кастрычніка ЗСУ здолелі прарваць расейскую абарону на паўночным усходзе Херсоншчыны і сталі імкліва прасоўвацца ўздоўж Дняпра. Расейцы мусілі адступаць, у тым ліку на цэнтральным участку Херсонскага фронту, пакінуўшы стратэгічна важнае паселішча Давыдаў Брод.
Глеб Нержын belsat.eu
