Сейм Літвы прызнаў Расейскую Федэрацыю тэрарыстычнай арганізацыяй, а дзеянні расейскіх войскаў ва Украіне – генацыдам. За адпаведную рэзалюцыю Сейм прагаласаваў аднагалосна. Партал «Delfi.lt» паведамляе, што 128 парламентарыяў прагаласавалі «за».
Рэзалюцыя літоўскага Сейму адзначае, што крамлёўскі рэжым імкнецца знішчыць украінскую нацыю, таму такія дзеянні мусяць быць прызнаныя генацыдам, а Расея – дзяржавай, што падтрымлівае і ажыццяўляе тэрарызм.
Сейм канстатаваў, што расейскія ўзброеныя сілы здзейснілі масавыя ваенныя злачынствы на тэрыторыі Украіны, у прыватнасці ў гарадах Буча, Ірпінь, Марыупаль, Барадзянка і Гастомэль. Згодна з дакументам, расейская вайсковая актыўнасць мела мэту поўнага або частковага знішчэння ўкраінскай нацыі шляхам забойства яе прадстаўнікоў цэлымі семʼямі, у тым ліку дзяцей. Расейскія вайскоўцы здзяйснялі выкраданні, катаванні, згвалтаванні.
«Сейм Літвы прызнае поўнамаштабную ўзброеную агрэсію супраць Украіны з боку узброеных сілаў Расейскай Федэрацыі і яе палітычнага ды ваеннага кіраўніцтва, распачатую 24 лютага 2022 года, генацыдам украінскага народу», – гаворыцца ў рэзалюцыі.
У дакуменце таксама адзначылі, што ўсе вінаватыя мусяць быць прыцягнутыя да адказнасці, а міжнародная супольнасць мусіць стварыць адмысловы міжнародны крымінальны трыбунал для расследавання і ацэнкі агрэсіі Расеі супраць суверэннай Украіны. Сейм Літвы заклікаў да таго, каб гэты трыбунал меў паўнамоцтвы выдаваць міжнародныя ордары на арышт – і каб у такіх справах не было імунітэту недатыкальнасці дзяржавы ці кіраўнікоў дзяржаваў і ўрадаў.
«Расейская Федэрацыя, узброеныя сілы якой свядома і сістэматычна знішчаюць цывільныя абʼекты, ёсць дзяржавай, што падтрымлівае і ажыццяўляе тэрарызм», – гаворыцца ў рэзалюцыі.
Вайна, якая пачалася 24 лютага, прывяла да смерці тысяч мірных жыхароў, разбурэння цывільнай інфраструктуры.
ЗХ belsat.eu
