Лідары краінаў ЕЗ у ноч на пятніцу прынялі заяву, у якой гаворыцца, што Еўразвяз, не чакаючы вынікаў разгляду Еўракамісіяй афіцыйнай заяўкі Украіны пра ўступленне ў ЕЗ, будзе хутка ўмацоўваць сувязі Еўразвязу і Украіны. Пра гэта паведамляе Бі-Бі-Сі.
«28 лютага 2022 года, рэалізуючы права Украіны на выбар свайго лёсу, прэзідэнт Украіны падаў заяўку краіны на ўступленне ў Еўрапейскі Звяз. Рада дзеяла хутка і прапанавала Камісіі выявіць сваё меркаванне аб гэтай заяве, згодна з палажэннямі дамовы.
Без прамаруджвання мы будзем далей умацоўваць нашыя сувязі і паглыбляць нашае партнёрства, каб падтрымаць Украіну на яе еўрапейскім шляху», – падкрэсліваецца ў заяве лідараў ЕЗ.
На гэтым пункце акцэнтаваў увагу старшыня Еўрапейскай рады Шарль Мішэль.
“… without delay, we will further strengthen our bonds and deepen our partnership to support Ukraine in pursuing its European path”. #Ukraine️ #WeStandWithUkraine #EUCO https://t.co/tNsriqVPtK
— Charles Michel (@eucopresident) March 11, 2022
Прэзідэнт Літвы Гітанас Наўседа кажа, што такім чынам лідары ЕЗ фактычна ўхвалілі еўраінтэграцыю Украіны.
«Гістарычная ноч у Вэрсалі, – напісаў у Twitter Гітанас Наўседа. – Пасля пяці гадзінаў гарачых дыскусіяў лідары ЕЗ сказалі так украінскай еўраінтэграцыі. Працэс пачаўся. Цяпер мы і ўкраінцы павінны зрабіць гэта хутка. Гераічная ўкраінская нацыя заслугоўвае ведаць, што яе вітаюць у ЕЗ».
A historic night at Versailles. After five hours of heated discussions EU leaders said yes to Ukrainian eurointegration. The process started. Now it is up to us and Ukrainians to accomplish it fast. Heroic Ukrainian nation deserves to know that they are welcome in EU.
— Gitanas Nausėda (@GitanasNauseda) March 11, 2022
ЕЗ таксама абяцае палітычнае, фінансавае, матэрыяльнае і гуманітарнае падтрыманне Украіне, запэўнівае, што ўсімі сіламі дапаможа аднавіць дэмакратычную дзяржаву пасля вайны.
У дакуменце падкрэсліваюць: «Расея і яе суўдзельніца Беларусь нясуць усю паўнату адказнасці за гэтую агрэсію, вінаватыя адкажуць за злачынствы». Лідары ЕЗ гатовыя «нарошчваць ціск на Расею і Беларусь» ды ўводзіць новыя санкцыі.
РР belsat.eu