Прэзідэнт Польшчы Анджэй Дуда падпісаў папраўкі ў закон аб дапамозе грамадзянам Украіны. Як адзначае радыё «Свабода», адна з правак тычыцца беларусаў: пацвердзіць беларускі атэстат зараз змогуць усе, а не толькі людзі з міжнароднай абаронай.
Адна з паправак дае магчымасць пацвердзіць у Польшчы атэстат аб пачатковай, сярэдняй, няпоўнай сярэдняй і прафесійнай адукацыі краіны, якая дэнансавала пагадненні з Польшчай аб прызнанні дакументаў аб адукацыі. Раней пацвердзіць атэстат праз адпаведную працэдуру ў Польшчы маглі толькі асобы са статусам уцекача і дадатковай абаронай, уцекачы ад узброеных канфліктаў, стыхійных бедстваў і іншых гуманітарных крызісаў, а таксама іхныя блізкія.
Беларусь прыпыніла пагадненне з Польшчай аб супрацы ў галіне адукацыі ў лютым 2023 года. Пазней стала вядома, што ў Беларусі перасталі выдаваць даведкі для паступлення ў замежныя вышэйшыя навучальныя ўстановы.
Праўкі, якія падпісаў прэзідэнт Польшчы, таксама прадугледжваюць стварэнне пасады міжкультурнага асістэнта, які будзе працаваць у школах для дапамогі замежным грамадзянам, якія не валодаюць польскай мовай на дастатковым для атрымання адукацыі ўзроўні.
Алесь Наваборскі belsat.eu
