«Медыязона» разам з «Бі-Бі-Сі» і камандай валанцёраў дакументальна пацвердзілі імёны 30 003 расейскіх вайскоўцаў, якія загінулі пасля пачатку поўнамаштабнага ўварвання Расеі ва Украіну.
На самой справе, як адзначаюць у зводцы самі аўтары, рэальная колькасць стратаў вышэйшая: згодна з падлікамі «Медыязоны» і «Медузы», усяго станам на канец траўня 2023 года ва Украіне загінула каля 47 000 чалавек (гэтыя дадзеныя атрыманыя на падставе збыткоўнай смяротнасці мужчын).
Лічба 30 003 атрымана ў выніку маніторынгу публічных паведамленняў пра гібель: пасты ў сацсетках ад сваякоў, навіны ў рэгіянальных СМІ і паведамленні мясцовых уладаў.
Пры гэтым, адзначаюць аўтары, толькі за апошнія два тыдні загінуў 1351 расейскі вайсковец. Адметна, што сярод гэтай колькасці прыкметны рост вайскоўцаў, якія належаць да ракетных войскаў і артылерыі.
Сярод загінулых цягам двух апошніх тыдняў вядомыя імёны чатырох афіцэраў у званні падпалкоўніка і вышэй: з пачатку вайны ў спісе высокапастаўленых афіцэраў значыцца 284 чалавекі, усяго ж за час вайны з лютага 2022 года загінула каля 2400 расейскіх афіцэраў.
Аўтары даследавання адзначаюць, што найбольшая колькасць загінулых паходзяць са Свярдлоўскай, Чалябінскай, Растоўскай абласцей, а таксама Башкірыі і Бураціі.
Нагадаем, што згодна са звесткамі Мінабароны Украіны агульныя страты расейскай арміі з пачатку ўварвання налічваюць 252 780.
Раман Шавель belsat.eu
