У выніку масаванага расейскага ракетнага абстрэлу па тэрыторыі Украіны, што адбыўся раніцай 10 кастрычніка, загінулі 19 асобаў, 105 атрымалі раненні, паведамляе ДСНС Украіны.
У выніку ўчорашняга абстрэлу ўкраінскіх тэрыторыяў былі траплянні па аб’ектах крытычнай і цывільнай інфраструктуры ў 12 рэгіёнах і Кіеве, дзе адбылося больш чым 30 пажараў. Усе яны былі зліквідаваныя.
Станам на 7:00 раніцы 11 кастрычніка без энергазабеспячэння заставаўся 301 населены пункт у пяці вобласцях Украіны: Кіеўскай, Львоўскай, Сумскай, Тэрнопальскай і Хмяльніцкай. За содні энергетыкі аднавілі пастаўкі энергіі ў больш чым 3,5 тыс. населеных пунктаў Палтаўскай, Сумскай, Тэрнопальскай, Львоўскай, Кіеўскай і Хмяльніцкай вобласцяў.
У электразабеспячэнні ДСНС задзейнічаныя 22 электрастанцыі, у тым ліку 15 для ўстановаў аховы здароўя Днепрапятроўскай, Запарожскай, Сумскай, Харкаўскай і Чарнігаўскай вобласцяў, а таксама 7 электрастанцыяў для аб’ектаў крытычнай інфраструктуры.
У гашэнні пажараў і аварыйна-выратавальных працах задзейнічалі больш чым тысячу асобаў і каля 120 адзінак тэхнікі ДСНС.
Ранкам 10 кастрычніка за дзве хвалі абстрэлаў расейскія войскі выпусцілі больш за 80 ракетаў, што ўдарылі па гарадах Кіеў, Роўна, Хмяльніцкі, Тэрнопаль, Сумы, Харкаў, Крывы Рог, Жытомір, Львоў, Івана-Франкоўск і Вінніца. У выніку былі разбураныя шматлікія аб’екты інфраструктуры, падстанцыі, ЦЭЦ, а таксама цывільныя аб’екты. Паводле ўкраінскага боку, СПА збіла 45 ракетаў, а таксама 9 з 12 запушчаных беспілотнікаў.
Алена Рувіна belsat.eu
