Пра інцыдэнт на віцебскім прадпрыемстве «Віцебскдрэў» паведаміла абласная прэса, потым з’явілася паведамленне МНС пра аднаго пацярпелага. Паводле ведамства, у цэху МДФ успыхнула пылапаветраная сумесь. Узгаранне ліквідаванае.
«У Віцебску на прадпрыемстве «Віцебскдрэў» – здарэнне. На месцы працуюць ратаўнікі і медычныя службы», – паведамілі «Витебские Вести».
Крыху пазней зʼявілася паведамленне МНС: «Ратаўнікі эвакуявалі 35 чалавек. Папярэдне – адзін мужчына пацярпеў».
На апублікаваным МНС відэа чутна, як абвяшчаецца «пажарная небяспека». Акрываўленага чалавека на насілках змяшчаюць у аўтамабіль хуткай дапамогі.
Як стала вядома пазней, у пацярпелага выявілі чэрапна-мазгавую траўму і пашкоджанні шкілету твару. Яго даставілі ў шпіталь для правядзення аперацыі. МНС паведамляла, што працаўнік быў траўмаваны жалезнай арматурай.
Папярэдняй прычынай пажару на «Віцебскдрэве», паводле МНС, стала ўспышка пыла-паветранай сумесі з узгараннем у цэху МДФ. Былі пашкоджаныя 250 квадратных метраў сценавых сэндвіч-панэляў звонку цэху. Пажар быў ліквідаваны.
Зміцер Міраш belsat.eu