Беларускі эканаміст Дзмітрый Крук прэзентаваў сваю новую працу «Эканоміка Беларусі ў новых умовах: што адбываецца і чаго чакаць». У ёй аналізуюцца перспектывы эканомікі ў святле вайны ва Украіне і ўвядзення санкцый у дачыненні да ўладаў Расеі ды Беларусі.
Згодна з эканамістам, Беларусь сутыкнулася з найгоршай з магчымых камбінацыяй негатыўных шокаў і іх беспрэцэдэнтным маштабам. Пры гэтым, на думку Дзмітрыя Крука, ва ўладаў краіны ёсць «бедны арсенал захадаў эканамічнай палітыкі». У прыватнасці, яны амаль не могуць паўплываць на рэальную дынаміку ў эканоміцы.
Эканаміст чакае маштабнае сцісканне ВУП, якае суправаджаецца высокай інфляцый, абясцэненнем абменнага курсу, фінансавай дэстабілізацый, якая перарастае ў поўнамаштабны фінансавы крызіс. Паводле яго, абменны курс ужо «страціў «берагі», а кошты імкнуцца да 25% эквіваленту гадавой інфляцыі. Эксперт мяркуе, што ліквіднасць банкаў будзе пагаршацца, а дэфолт стане вельмі верагодным.
Паводле ацэнак Дзмітрыя Крука, пры экспартным шоку каля 40% ВУП Беларусі за 2022 год можа скараціцца на 19,6%, а экспарт – на траціну.
Пры гэтым яшчэ больш пагоршыць перспектывы беларускай эканомікі могуць пашырэнне практыкі абмежаванняў у выкарыстанні ЗВР, дадатковыя санкцыі ў дачыненні да банкаў (SDN, SWIFT і інш.), блакаванне транспартных калідораў і ўзмацненне санкцый у дачыненні да дзярждоўгу.
Таксама Дзмітрый Крук не выключае далучэння да экспартных санкцый новых краін.
«Пакуль захоўваецца толькі прывідная надзея пазбегнуць такога развіцця падзей. Ледзь не безальтэрнатыўны шлях да гэтага – купіраваць санкцыі за кошт палітычных зменаў», – лічыць эканаміст.
У цэлым жа, мяркуе эксперт, «камбінацыя эканамічнага і фінансавага крызісу пагражаць стаць найбольш цяжкай у найноўшай гісторыі», а «якіх-небудзь магутных стабілізатараў для стопару развіцця крызісу практычна няма». На яго думку, «дно можна будзе намацваць доўга».
ПС belsat.eu
