Новая справа супраць сузаснавальнікаў фондаў By_Help і By_Sol працягвае папярэднюю, якая была заведзеная яшчэ летась у лістападзе, пра гэта ў жывым эфіры «Белсату» распавёў Аляксей Лявончык.
На дадзены момант Аляксей Лявончык знаходзіцца ў Лондане, у Беларусі ён абвешчаны ў вышук за дапамогу рэпрэсаваным.
«Мне падавалася, што крымінальная справа заведзеная пасля 11 лістапада, калі была першая спроба блакавання рахункаў атрымальнікаў нашай дапамогі, але ў выніку Следчы камітэт быў вымушаны вярнуць 80-85 адсоткаў заблакаваных сродкаў», – распавёў Аляксей Лявончык.
Паводле следства Аляксей Лявончык і Андрэй Стрыжак перадавалі грошы медыяменеджару Андрэю Аляксандраву і Ірыне Злобінай для аплаты штрафаў рэпрэсаваных асобаў у Беларусі.
«Андрэй і Іра дапамагалі кампенсаваць штрафы людзям, але прыцягванне сюды фінансаванне нейкіх экстрэмісцкіх фармаванняў – гэта хворая фантазія», – заявіў Лявончык.
Пасля лістападу, калі была першая спроба блакавання сродкаў, якія атрымлівалі беларусы ад дабрачынных фондаў быў уведзены шэраг іншых варыянтаў аплатаў.
«Мы прапаноўваем атрымліваць сродкі ў першую чаргу на замежныя рахункі, але калі людзі хочуць атрымліваць на беларускія, то мы іх папярэджваем, што іх варта лічыць «радыеактыўнымі», грошы зняць і нічога там больш не трымаць. У прынцыпе другая хваля блакавання, якая адбылася 30 снежня мінулага году паказала, што нашыя рэкамендацыі былі пачутыя», – кажа Лявончык.
Паводле прадстаўніка фонду By_Help калі першы раз беларускія сілавікі заблакавалі паўтары млн, то ў другі раз літаральна 5-6 тыс рублёў.
Цяпер колькасць заявак у фонд By_Help часткова зменшылася, да гэтага часу прадстаўнікі фонду апрацоўваюць 200-300 заявак на тыдзень.
12 красавіка на Аляксея Лявончыка і Андрэя Стрыжака завялі крымінальныя справы. МУС нібыта выявіў факты арганізацыі і перадачы сузаснавальнікамі фондаў By_Help і By_Sol грашовых сродкаў для выкарыстання іх у «злачыннай дзейнасці». Стрыжак і Лявончык абвешчаныя ў міждзяржаўны вышук.
Любы чалавек, які зазнаў рэпрэсіі ў Беларусі можа ўсцяж звярнуцца па дапамогу. Для гэтага дастаткова запоўніць вось гэтую Google-форму.
AA belsat.eu