Расейскія ўлады абвінавацілі ЗСУ ў абстрэле жылых кварталаў Белгараду. У выніку атакі абрынуўся пад’езд шматпавярховага дому. Паводле пракрамлёўскага каналу «Shot», пацярпелі 33 асобы. У Міністэрстве аховы здароўя Расеі пацвердзілі шпіталізацыю 17 параненых, у «надзвычайных службах» кажуць пра 20.
Губернатар Белгародскай вобласці Вячаслаў Гладкоў у сваім Telegram-канале напісаў, што «Белгарад і Белгародскі раён зазналі масаваны абстрэл з боку ЗСУ». Паводле чыноўніка, у адным доме «ў выніку беспасярэдняга трапляння снарада» абрынуўся пад’езд з дзясятага да першага паверху.
Пры гэтым Мінабароны Расеі сцвярджае, што шматпавярховік «быў пашкоджаны фрагментамі адной са збітых ракетаў “Точка-У”»:
«Падчас адбіцця атакі расейскімі сродкамі СПА знішчаныя 6 ракетаў “Точка-У”, 4 рэактыўныя снарады “Vampire” і 2 рэактыўныя снарады “Вольха”».
Відэа з месца здарэння сведчыць, што пад’езд дому спачатку абрынуўся не цалкам: на месцы застаўся дах. Ён абваліўся падчас пошукава-ратавальнай аперацыі. У той момант траўмы атрымалі тры ратавальнікі, паведамілі ў МНС Расеі. Паводле ведамства, з-пад абломкаў дасталі 16 асобаў.
Следчы камітэт Расеі завёў крымінальную справу аб тэракце. У ведамстве заявілі, што ў выніку інцыдэнту «ёсць загінулыя і пацярпелыя», аднак ліку не назвалі.
Telegram-канал «Shot» піша, што ЗСУ, імаверна, планавалі атакаваць цеплавую электрастанцыю непадалёк. Ва Украіне абстрэлу афіцыйна не каментавалі. Пры гэтым кіраўнік Цэнтру супрацьдзеяння дэзынфармацыі пры Радзе нацыянальнай бяспекі і абароны Андрэй Каваленка не выключыў, што шматпавярховік узарвалі, бо на відэа «не бачна аб’ектаў, якія падаюць»:
«Цалкам падобна на правакацыю Расеі або інфармацыйную прадукцыю з раздзіманнем сітуацыі дзеля апраўдання далейшых удараў па жылых дамах украінскіх гарадоў».
Сцяпан Кубік belsat.eu
